पंतप्रधान मोदी आणि ब्रिटनचे पंतप्रधान जॉन्सन यांची दिल्लीत महत्वाच्या मुद्द्यांवर बैठक

ब्रिटनचे पंतप्रधान बोरिस जॉन्सन भारत दौऱ्यावर आहेत. जॉन्सन यांच्या दोन दिवसीय भारत दौऱ्याचा आज दुसरा दिवस असून आता त्यांनी पंतप्रधान नरेंद्र मोदी यांची भेट घेतली आहे. पंतप्रधान नरेंद्र मोदी यांनी ब्रिटनच्या पंतप्रधानांचे दिल्लीतील राष्ट्रपती भवनात स्वागत केले. त्यानंतर बोरिस जॉन्सन आणि पीएम मोदींनी राजघाटवर पोहोचून महात्मा गांधींना श्रद्धांजली वाहिली. (England PM Boris Johnson meets Narendra Modi)

ताज्या माहितीनुसार, हैदराबाद हाऊसमध्ये पंतप्रधान मोदी आणि बोरिस जॉन्सन यांची बैठक आहे. या बैठकीत दोन्ही देशांमध्ये व्यापार आणि रशिया-युक्रेन युद्धावर चर्चा होऊ शकते, असे सांगण्यात येत आहे. त्याच वेळी, इंडो-पॅसिफिकमधील परिस्थितीवर विशेष लक्ष केंद्रित केले जाईल.

बोरिस जॉन्सन यांनी शुक्रवारी सांगितले की, "लोकशाहीला दुबळ करू इच्छिणाऱ्या देशांकडून जगाला वाढत्या धोक्यांचा सामना करावा लागत आहे." पंतप्रधान नरेंद्र मोदी यांच्याशी चर्चेपूर्वी जॉन्सन म्हणाले की, "भारत आणि ब्रिटनमधील हवामान बदलापासून ऊर्जा सुरक्षा आणि संरक्षण या मुद्द्यांवर भागीदारी महत्त्वाची आहे."