Dogs Playing Cricket With Kids Viral Video: क्रिकेट खेळायची प्रचंड इच्छा आहे, पण संघ पूर्ण करण्यासाठी खेळाडूच कमी पडत असतील तर आपण काय करु? साहजिकच बहुतेक लोक खेळ रद्द करतील किंवा घरी निघून जातील. पण सोशल मीडियावर व्हायरल झालेल्या एका अत्यंत मजेशीर व्हिडिओमध्ये काही मुलांनी या समस्येवर असा काही भन्नाट तोडगा काढला, ज्याने जगभरातील नेटीझन्सचे मन जिंकले. या मुलांनी आपल्या संघातील खेळाडूंची कमतरता भरुन काढण्यासाठी चक्क आपल्या चार पायांच्या इमानी मित्रांना म्हणजेच कुत्र्यांनाच क्रिकेट टीमचा भाग बनवले. सोशल मीडियावर (Social Media) सध्या हा अनोखा सामना तुफान व्हायरल होत आहे.
या व्हायरल व्हिडिओमध्ये काही लहान मुले एका दुर्गम, डोंगराळ भागात क्रिकेट खेळताना दिसत आहेत. चहूबाजूंनी पसरलेली हिरवळ, उंच-सखल दगड-धोंडे आणि मोकळे मैदान या सामन्याचे सौंदर्य अधिकच वाढवत आहेत. हे मैदान खेळासाठी अजिबात सपाट नाही, जागोजागी मोठे दगड आहेत, तरीही मुलांचा उत्साह तसूभरही कमी झालेला नाही. मैदानात मुलांसोबत दोन कुत्रे आणि आजूबाजूला चरणाऱ्या काही गाईसुद्धा दिसत आहेत. मात्र, या सामन्यात सर्वांचे लक्ष वेधून घेतले ते त्या दोन कुत्र्यांनी, जे केवळ मूक प्रेक्षक म्हणून तिथे उभे नव्हते, तर सामन्यातील सर्वात महत्त्वाचे आणि हुकमी खेळाडू बनले होते.
व्हिडिओमध्ये दिसत आहे की, त्यापैकी एक कुत्रा चक्क विकेटकीपरची भूमिका बजावत आहे. चेंडू जसा बॅटला न लागता मागे येतो, तसा तो अत्यंत चपळाईने तो चेंडू आपल्या तोंडात पकडतो. दुसरीकडे, दुसरा कुत्रा मैदानात इकडे-तिकडे धावून जबरदस्त फिल्डिंग करताना दिसतो. जेव्हा फलंदाज मोठा फटका मारतो आणि चेंडू लांब डोंगराच्या दिशेने जातो, तेव्हा हा चार पायांचा फिल्डर मोठ्या खडकांवरुन उड्या मारत चेंडूच्या मागे धावतो आणि काही क्षणातच चेंडू तोंडात पकडून परत आणतो.
या सामन्यातील सर्वात थरारक आणि मजेशीर क्षण तेव्हा येतो, जेव्हा फलंदाज एक मोठा शॉट खेळतो आणि हवेत उडालेला चेंडू एक कुत्रा थेट हवेत उडी मारुन कॅच घेतो. हा भन्नाट झेल पाहून फलंदाजी करणारे मूलही काही क्षणांसाठी अवाक आणि थक्क होऊन जाते. मात्र, तो चतुर कुत्रा कोणताही गाजावाजा न करता चेंडू तोंडात धरुन असा पुढे निघून जातो, जणू काही ही त्याच्यासाठी रोजचीच आणि अगदी सामान्य गोष्ट आहे.
मुलांमधील आणि प्राण्यांमधील हा ताळमेळ पाहून हे स्पष्ट होते की, ते दररोज एकत्र खेळत असावेत. या व्हिडिओवर 'Premium Subscription of Life' अशी सुंदर कॅप्शन देण्यात आले आहे, ज्याचा अर्थ जीवनाचा खरा आनंद महागड्या वस्तूंमध्ये नसून निसर्गाच्या सानिध्यात अशा छोट्या आणि सुंदर क्षणांमध्ये दडलेला असतो. हा व्हिडिओ नेमका कुठला आहे हे समजले नसले, तरी इंटरनेटवर तो लाखो लोकांच्या पसंतीस उतरत असून प्रचंड शेअर केला जात आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.