Himachal Pradesh Election Result: हिमाचल प्रदेश विधानसभा निवडणुकीत 68 पैकी 40 जागा मिळवून काँग्रेसने सत्ता आणली असली तरी त्यांनी सांगितल्याप्रमाणे शुक्रवारी काँग्रेसला मुख्यमंत्रीपद कुणाला द्यायचे हे ठरवता आलेले नाही. दरम्यान, मुख्यमंत्रीपदाचे प्रमुख दावेदार असलेल्या नेत्यांपैकी काँग्रेस प्रदेशाध्यक्ष प्रतिभा सिंह आणि माजी प्रदेशाध्यक्ष सुखविंदर सिंग सुक्खू यांच्या समर्थकांमध्ये शुक्रवारी जुंपली. दोन्ही नेत्यांचे समर्थक आमने सामने आले. त्यामुळे काही काळ तणावही निर्माण झाला होता.
नवनिर्वाचित आमदारांच्या एक तास झालेल्या बैठकीतही मुख्यमंत्रीपद कुणाला द्यायचे, यावर एकमत झालेले नाही. 40 आमदार आणि केंद्रीय निरीक्षकांच्या बैठकीत अंतिम निर्णय पक्षाच्या उच्चाधिकाऱ्यांवर सोपवण्यात आला आहे. आता मुख्यमंत्री कोण होणार याचा निर्णय थेट दिल्लीतून होणार आहे.
या बैठकीत प्रदेशाध्यक्ष आणि माजी मुख्यमंत्री वीरभद्र सिंह यांच्या पत्नी प्रतिभा सिंह, सुखविंदर सखू, मुकेश अग्निहोत्री, चंद्र कुमार, हर्षवर्धन चौहान आणि धनीराम शांडिल यांच्या नावांसह सहा नावांवर चर्चा झाली. पण कोणावरही एकमत होऊ शकले नाही. प्रतिभा सिंह आणि सुखविंदर सखू यांच्या नावावर सर्वात मोठा पेच अडकला आहे.
काँग्रेसचे हिमाचल प्रभारी राजीव शुक्ला म्हणाले की, आमदारांनी अंतिम निर्णयाचे सर्व अधिकार पक्ष हायकमांडला दिले आहेत. निरीक्षक उद्या हायकमांडला अहवाल सादर करतील. त्यानंतर लवकरच मुख्यमंत्रिपदाचा निर्णय घेऊन घोषणा केली जाईल. सर्व निर्णय हायकमांड घेतील. पक्षात गटबाजी नाही, असेही त्यांनी सांगितले.
बैठक 5 तास उशिरा सुरू
काँग्रेस आमदारांची बैठक दुपारी 3 वाजता होणार होती, मात्र सर्व आमदार फिरकले नाहीत. त्यानंतर काँग्रेसचे प्रभारी राजीव शुक्ला, निरीक्षक भूपेश बघेल आणि भूपेंद्र हुड्डा यांनी संध्याकाळी 6 वाजताची वेळ निश्चित केली. असे असूनही साडेसातच्या सुमारास सभा सुरू होऊ शकली.
गटबाजी चव्हाट्यावर
हिमाचल काँग्रेसमधील गटबाजी चव्हाट्यावर आली आहे. निरीक्षकांच्या उपस्थितीत प्रतिभा सिंह यांच्या समर्थकांनी घोषणाबाजी केली. सायंकाळच्या बैठकीत भूपेश बघेल पक्ष कार्यालयात पोहोचले तेव्हा काही समर्थक त्यांच्या गाडीवरही चढले. प्रतिभा समर्थकांनी काँग्रेस कार्यालयालाही घेराव घातला. मुख्यमंत्रिपदाचे दुसरे मोठे दावेदार सुखविंदर सखू हेही प्रदीर्घ प्रतिक्षेनंतर पक्ष कार्यालयात पोहोचले. सखू हे त्यांच्या 18 समर्थक आमदारांसह सापडत नव्हते. त्याचा नंबरही त्यांनी बंद केला होता. बड्या नेत्यांच्या समजूतीनंतर ते सायंकाळी उशिरा पक्ष कार्यालयात पोहोचले. ते येताच समर्थकांनी त्यांना खांद्यावर उचलून कार्यालयात नेले. यादरम्यान सखू आणि प्रतिभा सिंह यांच्या समर्थकांमध्ये बाचाबाचीही झाली. पोलिसांना हस्तक्षेप करावा लागला. समर्थकांना हाताळण्यासाठी अतिरिक्त सुरक्षा दलांना पाचारण करावे लागले.
काँग्रेस कार्यालयाबाहेर सखु यांच्यानंतर प्रतिभा सिंह यांच्या समर्थकांनी शक्तिप्रदर्शन सुरू केले. प्रतिभा सिंह यांचे आमदार पुत्र विक्रमादित्य सिंह यांना खांद्यावर उचलून समर्थकांनी जोरदार घोषणाबाजी केली. यावेळी त्यांच्या समर्थकांनी विक्रमादित्य सिंह यांच्यासाठी 'शेर आया, शेर आया'च्या घोषणा दिल्या.
दरम्यान, काँग्रेसचे निरीक्षक हरियाणाचे माजी मुख्यमंत्री भूपिंदर हुडा, राज्याचे प्रभारी राजीव शुक्ला, छत्तीसगडचे मुख्यमंत्री भूपेश बघेल यांनी हिमाचलच्या राज्यपालांची भेट घेऊन सरकार स्थापनेचा दावा केला आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.