केंद्र सरकारने देशातील सरकारी कर्मचाऱ्यांच्या महागाई भत्त्यात वाढ करण्यापूर्वीच जुन्या सीपीएफ (CPF) पेन्शनधारकांसाठी आणि त्यांच्या कुटुंबीयांसाठी एक अत्यंत मोठा आणि दिलासादायक निर्णय घेतला आहे. सरकारने त्यांच्या महागाई मदत भत्त्यामध्ये (DRA - Dearness Relief Allowance) घसघशीत वाढ केली आहे. सरकारच्या या निर्णयाचा थेट फायदा पाचव्या वेतन आयोगानुसार 'बेसिक एक्स-ग्रेशिया' पेमेंट घेणाऱ्या सेवानिवृत्त कर्मचाऱ्यांना आणि त्यांच्या आश्रितांना मिळणार आहे. वाढत्या महागाईच्या काळात केंद्र सरकारच्या या निर्णयामुळे हजारो पेन्शनधारक कुटुंबांना आर्थिक हातभार लाभणार आहे.
शासकीय आदेशानुसार, महागाई मदत भत्त्याचे हे वाढीव दर दोन वेगवेगळ्या टप्प्यांत म्हणजेच १ जुलै २०२५ आणि १ जानेवारी २०२६ पासून लागू मानले जातील. नव्या सुधारणेनुसार, १ जुलै २०२५ पासून हा भत्ता ४७४ टक्के, तर १ जानेवारी २०२६ पासून तो थेट ४८३ टक्के करण्यात आला आहे.
ही वाढ प्रामुख्याने पहिल्या आणि दुसऱ्या श्रेणीतील त्या सेवानिवृत्त कर्मचाऱ्यांना लागू होईल, जे १८ नोव्हेंबर १९६० ते ३१ डिसेंबर १९८५ या कालावधीत निवृत्त झाले आहेत आणि सध्या एक्स-ग्रेशिया पेमेंटचा लाभ घेत आहेत.
भत्त्यातील ही वाढ ग्रुप A, B, C आणि D मधील त्या लाभार्थ्यांवर लागू होईल, ज्यांना त्यांच्या श्रेणीनुसार अनुक्रमे ३००० रुपये, १००० रुपये, ७५० रुपये आणि ६५० रुपये एक्स-ग्रेशिया रक्कम मिळते. याशिवाय, दुसऱ्या कॅटेगरीतील मृत सीपीएफ कर्मचाऱ्यांच्या विधवा आणि त्यांच्यावर अवलंबून असलेली मुले, जे सध्या प्रतिमहिना ६५० रुपयांचे सुधारित एक्स-ग्रेशिया पेमेंट घेत आहेत, त्यांनाही या वाढीव भत्त्याचा पूर्ण लाभ मिळणार आहे.
केंद्रीय वित्त मंत्रालयाच्या खर्च विभागाच्या (Department of Expenditure) मंजुरीनंतर हा अधिकृत आदेश जारी करण्यात आला आहे. सरकारने आपल्या आदेशात स्पष्ट केले आहे की, महागाई मदत भत्त्याची गणना करताना जर अंतिम रक्कम दशांश बिंदूत (Decimal points) आली, तर ती पुढील पूर्ण रुपयामध्ये राऊंड ऑफ (Round off) केली जाईल.
या वाढीव भत्त्याची अचूक गणना करण्याची आणि तो पेन्शनधारकांपर्यंत पोहोचवण्याची संपूर्ण जबाबदारी संबंधित पेन्शन वाटप करणाऱ्या यंत्रणांवर आणि सरकारी बँकांवर सोपवण्यात आली आहे. हा लाभ केवळ पाचव्या वेतन आयोगाच्या कक्षेत येणाऱ्या सीपीएफ लाभार्थ्यांसाठीच मर्यादित असेल, हे देखील सरकारने स्पष्ट केले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.