Crime News: मित्रांकडून तरुणाचा निर्घृण खून, नारळ विक्रीच्या पैशावरून वाद; दोन संशयित अटकेत

शिरगुप्पी: ऐनापूर (ता. कागवाड) येथे नारळ विक्रीतून मिळालेल्या पैशांच्या वाटपावरून झालेल्या वादातून मित्रांनीच एकाचा निर्घृण खून केल्याची धक्कादायक घटना उघडकीस आली आहे. याप्रकरणी कागवाड पोलिसांनी दोन संशयितांना अटक केली असून, पुढील तपास सुरू आहे.

संतोष सिद्धप्पा कमते (वय ३३, रा. ऐनापूर) असे मृत तरुणाचे नाव आहे. पोलिसांनी दिलेल्या माहितीनुसार, सोमवारी दुपारी संतोषने आपल्या दोन मित्रांसह शेतातील झाडांवरून नारळ काढले. त्यानंतर हे नारळ ऐनापूरमधील एका दुकानात विक्रीस ठेवून त्यातून काही रक्कम मिळवली.

या पैशातून तिघांनी मद्यपान केले. नशेत घरी परतताना उरलेल्या पैशांच्या वाटपावरून तिघांमध्ये जोरदार वाद झाला. हा वाद काही वेळातच विकोपाला गेला. संतापाच्या भरात आणि नशेच्या प्रभावाखाली असलेल्या दोघा मित्रांनी संतोषला बेदम मारहाण केली.

मारहाणीमुळे तो गंभीर जखमी झाल्यानंतरही संशयित थांबले नाहीत. त्यांनी जवळच असलेल्या मोठ्या दगडाने संतोषच्या डोक्यावर प्रहार करून त्याचा जागीच खून करून घटनास्थळावरून पळ काढला.

घटनेची माहिती मिळताच अथणीचे उपविभागीय पोलिस अधिकारी प्रशांत मुन्नोळी, सीपीआय संतोष हल्लूर, पीएसआय राघवेंद्र खोत व त्यांच्या पथकाने घटनास्थळी धाव घेतली. पोलिसांनी तत्काळ तपासाची चक्रे फिरवत काही तासांतच संशयितांना जेरबंद केले. बाहुबली

भोगसे (वय २८) व श्रीशैल मडिवाळर (३१, दोघेही रा. ऐनापूर) अशी अटक केलेल्या संशयितांची नावे आहेत.

या घटनेमुळे ऐनापूर परिसरात खळबळ उडाली असून, मद्यपानामुळे मैत्रीचाच बळी गेला’ अशी चर्चा नागरिकांमध्ये सुरू आहे. मृत संतोषच्या कुटुंबावर दु:खाचा डोंगर कोसळला असून, गावात शोककळा पसरली आहे. या प्रकरणाचा अधिक तपास कागवाड पोलिस करत आहेत.