Karnataka Election: 'सरकार बनवणे हे आमचे ध्येय, कसे ते विचारु नका...', निकालापूर्वी भाजप नेत्याचं मोठं वक्तव्य!

Karnataka Election: कर्नाटक विधानसभा निवडणुकीच्या निकालाला अवघे काही तास उरले आहेत. सत्ताधारी भारतीय जनता पक्ष (BJP) उद्या म्हणजेच शनिवारी जाहीर होणार्‍या निकालापूर्वी नियोजन करण्यात व्यस्त आहे.

यादरम्यान कर्नाटकचे महसूल मंत्री आर अशोक यांनी निकालापूर्वी मोठे वक्तव्य केले आहे. अशोक म्हणाले की, 'भाजप सर्वात मोठा पक्ष म्हणून उदयास आला नाही तरी सरकार स्थापन करेल.'

मंत्री महोदय एवढ्यावरच थांबले नाहीत. ते पुढे म्हणाले की, “आमचे उद्दिष्ट सरकार स्थापन करण्याचे आहे…. आम्ही कसे किंवा काय करणार हे विचारु नका.

आम्ही नक्कीच जिंकू आणि बहुमत मिळवू. मात्र त्रिशंकू स्थिती निर्माण झाली तरी आम्हीच सरकार स्थापन करु.''

त्रिशंकूची स्थिती उद्भवणार नाही

अशोक यांच्या वक्तव्यावर प्रतिक्रिया व्यक्त करताना कर्नाटक भाजपचे (BJP) प्रवक्ते एमजी महेश यांनी इंडियन एक्स्प्रेसशी बोलताना सांगितले की, “अंदाज लावायला जागा नाही” कारण भाजप बहुमत मिळवण्यासाठी पुरेशा जागा मिळवेल. त्रिशंकू स्थिती निर्माण होणार नाही”. आम्ही सरकार स्थापन करु. एक्झिट पोलचे अंदाज काहीही असले तरी, आम्हाला सरकार स्थापन करण्यावर विश्वास आहे.''

"केंद्राकडून मदतीची योजना"

भाजप नेत्यांच्या टिप्पण्या अशा वेळी आल्या आहेत, जेव्हा बहुतेक एक्झिट पोलने 224 सदस्यांच्या विधानसभेत काँग्रेसला (Congress) आघाडी किंवा स्पष्ट बहुमत दिले आहे.

काहींनी तर त्रिशंकू स्थितीचा अंदाज वर्तवला आहे. आर अशोक म्हणाले की, कर्नाटकात भाजप सरकार स्थापन करेल असा विश्वास आहे.

ते पुढे म्हणाले की, “आम्ही सरकार स्थापन करु. काँग्रेस सर्वात मोठा पक्ष म्हणून समोर आला तरी त्याला बहुमत मिळणार नाही. त्यामुळे बाकीच्या आमदारांसाठी आम्हाला केंद्र सरकारची मदत लागेल वगैरे…”

2019 मध्ये सरकार पडले

भाजपचे मंत्री म्हणाले की, “सर्व आमदारांना माहित होते की केवळ भाजपच स्थिर सरकार देऊ शकते. कारण, तुम्ही पाहिल्याप्रमाणे, काँग्रेस-जेडी(एस) सरकार (2018 मध्ये स्थापन झालेले) एका वर्षातच पडले." 2019 च्या राजकीय संकटाच्या वेळी, काँग्रेस आणि जेडी(एस) मधील 17 आमदारांनी भाजपमध्ये प्रवेश केला आणि सरकार स्थापन करण्यास मदत केली.''

तसेच, अशोक यावेळी दोन जागांवरुन निवडणूक लढवत आहेत. त्यांनी पद्मनाभनगर आणि कनकापुरा मतदारसंघातून निवडणूक लढवली आहे. पद्मनाभनगर हे त्यांचे होम ग्राउंड आहे.

काँग्रेस नेत्याचा बालेकिल्ला असलेल्या कनकपुरामध्ये त्यांचा सामना कर्नाटक काँग्रेसचे अध्यक्ष डीके शिवकुमार यांच्याशी आहे.

2008-2013 दरम्यान जेव्हा कर्नाटकात भाजप पहिल्यांदा सत्तेवर आला, तेव्हा सरकारच्या कार्यकाळाच्या शेवटच्या वर्षात अशोक आणि केएस ईश्वरप्पा यांची उपमुख्यमंत्री म्हणून नियुक्ती करण्यात आली होती.

सहा वेळा आमदार राहिलेल्या त्यांनी यापूर्वी गृह, वाहतूक आणि आरोग्य आणि कौटुंबिक व्यवहार अशी खाती सांभाळली आहेत.