VIDEO: बिहार बंददरम्यान विद्यार्थ्यांवर थेट 'एके-47' ने गोळीबार! पोलिसांचा अमानुष चेहरा कॅमेऱ्यात कैद; एसआयटी जवान डिस्मिस

Bihar Police AK47 Firing On Students Video: कॉकरोच जनता पार्टीच्या आंदोलनाला पाठिंबा देण्यासाठी 25 जुलै रोजी पुकारण्यात आलेल्या 'बिहार बंद'दरम्यान एक अत्यंत धक्कादायक आणि संतापजनक प्रकार समोर आला. सीवान जिल्ह्यात आंदोलनकर्त्या विद्यार्थ्यांवर एका पोलीस कर्मचाऱ्याने थेट 'एके-47' या घातक रायफलीने अंधाधुंद गोळीबार केल्याचा व्हिडिओ सोशल मीडियावर तुफान व्हायरल झाला. या गंभीर घटनेची दखल घेत सीवानचे पोलीस अधीक्षक पूरन कुमार झा यांनी तातडीने कारवाई करत संबंधित पोलीस कर्मचाऱ्याला तात्काळ प्रभावाने निलंबित केले.

गोळीबार करणाऱ्या या कर्मचाऱ्याची ओळख एसआयटीमध्ये तैनात असलेला कॉन्स्टेबल अभिषेक पटेल म्हणून झाली असून त्याच्या या बेकायदेशीर कृत्यामुळे बिहार पोलिसांवर सर्वस्तरातून टीका होत आहे.

25 जुलै रोजी राज्यव्यापी बंददरम्यान हजारो विद्यार्थी घोषणाबाजी करत आंदोलनासाठी गांधी मैदानाच्या दिशेने निघाले होते. यादरम्यान अनेक ठिकाणी पोलीस आणि आंदोलक विद्यार्थ्यांमध्ये चकमक झाली. मात्र, सीवानमध्ये परिस्थिती हाताबाहेर गेल्याचे दाखवत एसआयटीच्या जवानाने थेट 'एके-47'ने थेट गोळ्या झाडण्यास सुरुवात केली. बिहार (Bihar) पोलीस मुख्यालयाने या व्हायरल व्हिडिओची स्वतःहून दखल घेत संबंधित कर्मचाऱ्याची ओळख पटवून त्याच्यावर तात्काळ निलंबनाची कुऱ्हाड चालवली.

या घटनेनंतर बिहार आणि देशाच्या राजकारणात मोठा भूकंप झाला. विरोधी पक्षनेते तेजस्वी यादव यांनी आपल्या 'एक्स' अकाऊंटवरुन हा थरारक व्हिडिओ शेअर करत सरकारवर जोरदार हल्लाबोल केला. "निर्दोष विद्यार्थ्यांवर थेट एके-47 ने गोळ्या झाडल्या जात असून ही लोकशाहीची उघडपणे हत्या आहे," असा आरोप करत त्यांनी दोषी अधिकाऱ्यांवर कडक कारवाईची मागणी केली. तर दुसरीकडे, संसदेत विरोधी पक्षनेते राहुल गांधी यांनी हा मुद्दा उपस्थित करत दिल्ली पोलीस आणि बिहार पोलिसांच्या या हिंसक पॅटर्नवर आक्षेप घेतला. कायदा आणि सुव्यवस्था राखण्याचे काम पोलिसांचे असून कायदा हातात घेण्याचे नाही, असा घणाघात त्यांनी केला.