Sheetla Temple Bihar Stampede : बिहारमधील नालंदा जिल्ह्यातून एक अत्यंत हृदयद्रावक घटना समोर आली आहे. दीपनगर पोलीस ठाण्याच्या हद्दीतील प्रसिद्ध शीतला माता मंदिरात दर्शनासाठी जमलेल्या भाविकांमध्ये भीषण चेंगराचेंगरी झाली. या दुर्घटनेत आतापर्यंत ८ जणांचा मृत्यू झाला असून अनेक भाविक गंभीर जखमी झाले आहेत. चैत्र महिन्यातील शेवटच्या मंगळवारी दर्शनासाठी झालेल्या अफाट गर्दीमुळे ही परिस्थिती ओढवल्याचे सांगण्यात येत आहे.
चैत्र महिन्याचा शेवटचा मंगळवार असल्याने शीतला देवी मंदिरात विशेष पूजा आणि मेळ्याचे आयोजन करण्यात आले होते. पहाटेपासूनच हजारो भाविकांनी दर्शनासाठी रांगा लावल्या होत्या. मात्र, मिळालेल्या माहितीनुसार, एवढ्या मोठ्या प्रमाणावर जमणाऱ्या गर्दीला हाताळण्यासाठी मंदिर प्रशासन किंवा स्थानिक पोलिसांकडून कोणतेही ठोस नियोजन करण्यात आले नव्हते. बॅरिकेड्सची कमतरता आणि सुरक्षा रक्षकांचा अभाव यामुळे गर्दी अनियंत्रित झाली, ज्याचे रूपांतर अखेर मृत्यूच्या तांडवात झाले.
प्रत्यक्षदर्शींनी दिलेल्या माहितीनुसार, लवकरात लवकर दर्शन घेण्याच्या नादात भाविकांमध्ये एकमेकांना मागे सारण्याची स्पर्धा सुरू झाली. रांगा मोडून लोक पुढे जाण्याचा प्रयत्न करू लागले, ज्यामुळे बाचाबाची आणि नंतर धक्काबुक्की सुरू झाली. या धावपळीत अनेकजण जमिनीवर कोसळले आणि मागे असलेले लोक त्यांच्या अंगावरून पुढे गेले. आरडाओरडा आणि गोंधळामुळे लोक सैरावैरा धावू लागले, ज्यामुळे परिस्थिती अधिकच हाताबाहेर गेली.
घटनेची माहिती मिळताच पोलीस आणि जिल्हा प्रशासनाचे पथक तातडीने घटनास्थळी दाखल झाले. पोलिसांनी मंदिर परिसर रिकामा करून जखमींना जवळच्या रुग्णालयात दाखल केले आहे. दुर्दैवाने, रुग्णालयात नेईपर्यंत ८ भाविकांनी आपला प्राण गमावला होता. सध्या परिसरात तणावपूर्ण शांतता असून मृतांची ओळख पटवण्याचे काम सुरू आहे. मृतांच्या नातेवाईकांमध्ये मोठी शोककळा पसरली असून या दुर्घटनेला जबाबदार असणाऱ्यांवर कारवाई करण्याची मागणी होत आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.