VIDEO: विजेचा खांब पडला अन् अफवा पसरली; बिहारच्या अशोकधाम मंदिरात चेंगराचेंगरी, 7 जणांचा मृत्यू; अनेक जण जखमी

बिहारमधील लखीसराय येथील प्रसिद्ध अशोक धाम म्हणजेच इंद्र दमनेश्वर महादेव मंदिरात सोमवारी सकाळी मोठी दुर्घटना घडली. श्रावणातील तिसरा सोमवार असल्याने भगवान शंकराच्या दर्शनासाठी आणि जलाभिषेकासाठी मंदिरात भाविकांची मोठी गर्दी झाली होती. याच गर्दीत अचानक गोंधळ निर्माण झाल्यानंतर चेंगराचेंगरी झाली. या दुर्घटनेत 7 भाविकांचा मृत्यू झाल्याची माहिती असून अनेक जण जखमी झाले आहेत.

सकाळी पावणेसातच्या सुमारास दुर्घटना

मिळालेल्या माहितीनुसार, सकाळी सुमारे 6.45 वाजता ही घटना घडली. जलाभिषेकासाठी भाविक रांगेत उभे होते. त्याचवेळी अशोक धाम हॉल्ट परिसरात अचानक गोंधळाची परिस्थिती निर्माण झाली. रेल्वे स्थानकाच्या दोन्ही बाजूंनी एकाच वेळी रेल्वे आल्याने काही तरुणांमध्ये धावपळ सुरू झाल्याचे प्रशासनाकडून सांगण्यात आले.

या धावपळीमुळे परिसरातील विजेचा खांब खाली पडला. त्यानंतर खांबामध्ये वीज प्रवाह असल्याची अफवा वेगाने पसरली. प्रत्यक्षात त्या वेळी वीजपुरवठा बंद असल्याचे अधिकाऱ्यांनी स्पष्ट केले आहे. मात्र अफवेमुळे भाविकांमध्ये भीतीचे वातावरण निर्माण झाले आणि लोक सुरक्षित ठिकाणी जाण्यासाठी धावू लागले.

भाविक एकमेकांवर कोसळले

गर्दीच्या ठिकाणी अचानक सुरू झालेल्या धावपळीमुळे परिस्थिती काही क्षणांत नियंत्रणाबाहेर गेली. अनेक भाविक खाली पडले आणि त्यांच्या मागून येणारे लोकही त्यांच्यावर कोसळले. त्यामुळे चेंगराचेंगरीसारखी परिस्थिती निर्माण झाली.

या दुर्घटनेत अनेक भाविक जखमी झाले असून काहींची प्रकृती गंभीर असल्याची माहिती आहे. जखमींना तातडीने जवळच्या रुग्णालयात दाखल करण्यात आले. डॉक्टरांकडून त्यांच्यावर उपचार सुरू आहेत.

प्रशासन आणि पोलिसांकडून बचावकार्य सुरू

घटनेची माहिती मिळताच पोलीस आणि प्रशासनाचे अधिकारी तातडीने घटनास्थळी पोहोचले. स्थानिक नागरिकांच्या मदतीने बचावकार्य सुरू करण्यात आले. जखमींना गर्दीतून बाहेर काढून रुग्णालयात नेण्यात आले.

जिल्हाधिकारी शैलेंद्र कुमार आणि एडीएम नीरज कुमार यांनी घटनास्थळाची पाहणी केली. प्राथमिक माहितीनुसार, अफवेमुळे निर्माण झालेली घबराट आणि त्यानंतर झालेली धावपळ ही दुर्घटनेमागील प्रमुख कारणे असल्याचे अधिकाऱ्यांनी सांगितले आहे.

उच्चस्तरीय चौकशीचे आदेश

या गंभीर दुर्घटनेनंतर प्रशासनाने संपूर्ण घटनेच्या चौकशीचे आदेश दिले आहेत. गर्दीचे व्यवस्थापन, रेल्वे परिसरातील परिस्थिती आणि दुर्घटनेपूर्वी नेमके काय घडले, याचा तपास केला जाणार आहे.

श्रावणातील सोमवारी मंदिरात मोठ्या संख्येने भाविक येत असल्याने सुरक्षाव्यवस्थेचा मुद्दाही आता चर्चेत आला आहे. दुर्घटनेनंतर मंदिर परिसरातील परिस्थिती नियंत्रणात आणण्यासाठी प्रशासनाकडून आवश्यक उपाययोजना करण्यात येत आहेत.

भाविकांमध्ये हळहळ, सुरक्षेवर प्रश्नचिन्ह

धार्मिक स्थळी दर्शनासाठी आलेल्या भाविकांचा अशा प्रकारे मृत्यू झाल्याने परिसरात शोककळा पसरली आहे. दुर्घटनेनंतर भाविकांच्या सुरक्षिततेसाठी गर्दीचे नियोजन आणि अफवांवर नियंत्रण ठेवण्याची गरज पुन्हा अधोरेखित झाली आहे. प्रशासनाच्या अंतिम चौकशीनंतर दुर्घटनेची नेमकी कारणे आणि जबाबदारी स्पष्ट होणार आहे.