Bengaluru Airport Bomb Threat: "माझ्याकडे दोन बॉम्ब आहेत", बंगळुरु विमानतळावर हायव्होल्टेज ड्रामा; इंडिगो प्रवाशाच्या पोलिसांनी आवळल्या मुसक्या

Bengaluru Airport Bomb Threat: बंगळुरु येथील केम्पेगौडा आंतरराष्ट्रीय विमानतळावर बुधवारी (28 जानेवारी) दोन वेगवेगळ्या विमानांतील प्रवाशांच्या बेजबाबदार वर्तनामुळे खळबळ उडाली. या दोन्ही घटनांमध्ये प्रवाशांच्या उद्धटपणामुळे विमानतळ प्रशासनाला पोलिसांची मदत घ्यावी लागली असून दोन्ही आरोपींविरुद्ध कायदेशीर गुन्हे दाखल करण्यात आले आहेत.

पहिली घटना बुधवारी सकाळी 6 वाजण्याच्या सुमारास घडली, जेव्हा 52 वर्षीय व्यावसायिक अबू अकील अजहर हा अहमदाबादला जाणाऱ्या इंडिगोच्या विमानात चढण्यासाठी सुरक्षा तपासणीच्या प्रक्रियेतून जात होता. यावेळी सुरक्षा कर्मचाऱ्यांनी केलेल्या तपासणीमुळे संतापलेल्या या प्रवाशाने आपल्याकडे "दोन छोटे बॉम्ब" असल्याचे वक्तव्य केले. या एका वक्तव्यामुळे सुरक्षा यंत्रणांची एकच पळापळ झाली आणि तातडीने कडक सुरक्षा प्रोटोकॉल लागू करण्यात आले.

इंडिगोचे (Indigo) सुरक्षा व्यवस्थापक रुशाद होमी यांनी याप्रकरणी औपचारिक तक्रार दाखल केली. या तक्रारीनुसार, प्रवाशाने वापरलेली धमकीची भाषा विमानातील प्रवासी आणि कर्मचाऱ्यांच्या सुरक्षेसाठी धोकादायक ठरु शकली असती. पोलिसांनी तात्काळ कारवाई करत अबू अकील याला ताब्यात घेतले. चौकशीदरम्यान त्याने सांगितले की, सुरक्षेच्या लांबलचक प्रक्रियेमुळे त्याला टेन्शन आले होते आणि त्या रागातूनच त्याने हे चुकीचे वक्तव्य केले. मात्र, सुरक्षेच्या गंभीर मुद्द्यामुळे बंगळुरु विमानतळ पोलिसांनी त्याच्यावर भारतीय न्याय संहितेच्या संबंधित कलमान्वये गुन्हा दाखल करुन त्याला अटक केली.

दुसरी घटना बंगळुरुहून (Bengaluru) रांचीला जाणाऱ्या एअर इंडिया एक्सप्रेसच्या विमानात घडली. या विमानातील स्नेहा कुमारी नावाच्या महिला प्रवाशाने सुरक्षा तपासणीदरम्यान कर्मचाऱ्यांना सहकार्य करण्यास नकार दिला. एवढेच नाही तर तिने एअरलाइनच्या कर्मचाऱ्यांशी अत्यंत अश्लील भाषेत हुज्जत घातली आणि शिवीगाळ केली. सुरुवातीला तांत्रिक कारणास्तव तक्रार मागे घेण्यात आली होती, परंतु गुरुवारी पोलिसांनी या घटनेची दखल घेत नवीन तक्रार नोंदवून घेतली. आता या महिला प्रवाशाविरुद्धही कायदेशीर गुन्हा दाखल करण्यात आला असून पोलीस पुढील तपास करत आहेत. विमानतळावर सुरक्षा नियमांचे पालन न करणे आणि अफवा पसरवणे प्रवाशांना किती महागात पडू शकते, हे या दोन घटनांवरुन स्पष्ट झाले आहे.