मास्टर प्राईस

गौतम कामत बांबोळकर ‘गोवा कॉलेज ऑफ फाइन आर्ट्स’चा (Goa College of Fine Arts) माजी विद्यार्थी. बांदोडा, फोंडा हे त्याचे गाव. सध्या तो अमेरिकेत असतो. अभिमानाची गोष्ट म्हणजे गौतमच्या ‘मॅन मेड केव्हज’ ही फोटो सिरीज (Photo series) आणि ‘रीइमॅजिन्डस वॅसल’ या फोटोसाठी त्याला अत्यंत प्रतिष्ठेचा ‘आर्किटेक्चर मास्टर प्राईस फॉर 2021 इंटेरियर आर्किटेक्चर फोटोग्राफी’ हा पुरस्कार ‘पब्लिक इंटेरियर’ (Public interior) या गटातून प्राप्त झालेला आहे. त्याचे दोन्ही फोटो ‘बेस्ट ऑफ बेस्ट’ (Best Of Best) म्हणून घोषित झालेले आहेत.

‘द आर्किटेक्चर फोटोग्राफी मास्टर प्राइस’ हा पुरस्कार बांधकाम क्षेत्रात घेतलेल्या उत्कृष्ट फोटोसाठी देण्यात येतो. जगभर घेतल्या जाणाऱ्या स्थापत्यविषयक छायाचित्रांचा सन्मान व्हावा या उद्देशाने ही स्पर्धा आयोजित केली जाते. स्थापत्यविषयक एक्स्टेरियर, इंटेरियर आणि इतर प्रकारच्या छायाचित्रांचा समावेश या स्पर्धेत असतो. वेगवेगळ्या क्षेत्रात काम करणाऱ्या आणि वैविध्यपूर्ण पार्श्वभूमी असणाऱ्या जगभरच्या तज्ञांचा समावेश या स्पर्धेच्या ज्युरी मंडळात असतो. स्थापत्य, अंतर्गत सजावट. कला, पत्रकार, शिक्षण अशा क्षेत्रात काम करून स्थापत्यशास्त्राला अधिक विकसित करणारे लोक या स्पर्धेशी निगडीत आहेत. गौतम कामत बांबोळकर सध्या न्युयॉर्क शहरात गुगलसाठी इंटरॅक्शन डिझायन विभागात काम करतो.

गौतम लिहितो, जेव्हा तो 9 व्या स्ट्रीटवर असलेल्या पाथ स्टेशनच्या पायर्‍या उतरत होता, एक जटील पोत असलेले केबल पाईप त्याच्या माथ्यावर संमोहित करणाऱ्या रचनेद्वारे अगदी अनंतापर्यंत पसरले होते. ही रचना एका मानवी गुहेपेक्षा कमी नव्हती.