Paytm Payments Bank: बिनधास्त राहा! पेटीएमवरील कारावाईचा ग्राहकांना कोणताही धोका नाही, आरबीआयची हमी

RBI Governer On Paytm Payments Bank:

गेल्या काही दिवसांपासून पेटीएमवर कोणती ना कोणती कारवाई होत आहे. अशात पेटीएम ग्राहकांमध्ये चिंता निर्माण झाली आहे.

मात्र, याबाबत खुलासा करताना आरबीआयचे गव्हर्नर शक्तीकांत दास म्हणाले, पेटीएम पेमेंट्स बँकेवर केलेल्या कारवाईमुळे 80 ते 85 टक्के पेटीएम वॉलेट ग्राहकांची कोणतीही गैरसोय होणार नाही. तसेच उर्वरित ग्राहकांना त्यांचे ॲप इतर बँकांशी लिंक करण्याचा सल्ला देण्यात आला आहे.

रिझर्व्ह बँक ऑफ इंडिया (RBI) ने 31 जानेवारी रोजी पेटीएम पेमेंट्स बँक लिमिटेड (PPBL) ला कोणत्याही ग्राहकाच्या खात्यातील ठेवी, क्रेडिट व्यवहार किंवा टॉप-अप स्वीकारण्यास मनाई केली होती.

आरबीआय गव्हर्नर म्हणाले की PPBL शी जोडलेल्या वॉलेटवर इतर खात्यांमधून बंदी घालण्यात येईल. बँकांशी लिंक करण्याची अंतिम मुदत 15 मार्च निश्चित करण्यात आली आहे. १५ मार्चपर्यंत दिलेली मुदत पुरेशी असून ती वाढवण्याची गरज नसल्याचे त्यांनी सांगितले.

आरबीआय गव्हर्नर शक्तीकांत दास म्हणाले की, एकूण पेटीएम वॉलेटपैकी 80 ते 85 टक्के इतर बँकांशी जोडलेले आहेत आणि उर्वरित 15 टक्के वॉलेट्सना इतर बँकांमध्ये जाण्याचा सल्ला देण्यात आला आहे.

ते म्हणाले की आरबीआयने नियमन केलेल्या घटकाविरुद्ध कारवाई केली आहे, जी या प्रकरणात पीपीबीएल आहे आणि त्यात फिनटेक कंपन्यांविरुद्ध काहीही नाही.

एका मुलाखतीदरम्यान, दास यांनी जोर दिला की आरबीआय आर्थिक तंत्रज्ञान क्षेत्रातील नाविन्यपूर्णतेला अनुकूल आहे. ते म्हणाले, 'आरबीआय फिनटेकला पूर्ण समर्थन करते आणि पुढेही करत राहील.