आता 'व्हॉइस मेसेज'द्वारेही बुक करता येणार एलपीजी सिलिंडर

सतत अपग्रेड होत जाणाऱ्या तंत्रज्ञानासोबतच आपले जीवनही सुसह्य होत आहे. गॅस सिलिंडरच्या (Gas cylinder) बुकिंगसाठी गॅस एजन्सीच्या लाईनमध्ये तासनतास उभं राहायचं ही बाब फार जुनी नाहीये. पण आज तोच गॅस सिलेंडर मिस्ड कॉल किंवा मेसेजने सहजरित्या बुक होतो. पैसे ऑनलाइन जमा होतात आणि गॅस सिलिंडर दुसऱ्या-दोन दिवसांत घरीही पोच होतो. (LPG cylinders can now be booked through voice message)

आता या प्रकरणात आणखी नवीन तंत्रांचा शोध लागला आहे. यामध्ये, सरकारी मालकीच्या भारत पेट्रोलियम कॉर्पोरेशन लिमिटेड (BPCL) ने गॅस (LPG) सिलिंडर बुक करण्यासाठी व्हॉइस आधारित डिजिटल पेमेंट सुविधाही सुरू केली आहे. ज्यांच्याकडे स्मार्टफोन किंवा इंटरनेट नाही, ते गॅस सिलिंडर बुक करू शकतात आणि बेसिक फोनवरून व्हॉइस मेसेज पाठवून सहजरित्या पेमेंट करू शकता. (LPG cylinders News)

भारतीय रिझर्व्ह बँकेचे (Reserve Bank of India) गव्हर्नर शक्तिकांत दास यांनी UPI123PAY लाँच करण्याची घोषणा केली. UPI123PAY सेवा सुरू करणारी BPCL ही देशातील पहिली कंपनी ठरली आहे.

ही सेवा अशी कार्य करेल

BPCL ने व्हॉइस आधारित डिजिटल पेमेंट सुविधा प्रदान करण्यासाठी अल्ट्राकॅश टेक्नॉलॉजीज प्रायव्हेट लिमिटेडशी भागीदारी केली असल्याचे समोर आले आहे. या सुविधेसह, भारत गॅसचे ग्राहक UPI123PAY द्वारे त्यांचे LPG सिलेंडर बुक करू शकतात आणि पैसेही देऊ शकतात.