LIC ची 'धन वृद्धी' योजना फक्त तुमच्यासाठी, 30 सप्टेंबरपर्यंत करु शकता अर्ज; मिळतील 'हे' फायदे

LIC द्वारा वेळोवेळी ग्राहकांसाठी अनेक नवीन योजना आणल्या जातात, ज्यामध्ये तुम्हाला चांगला परतावा मिळतो. तसेच भविष्याची हमीही मिळते. आज LIC ने ग्राहकांसाठी आणखी एक नवीन योजना आणली आहे. या योजनेत तुम्ही फक्त 23 जून 2023 ते 30 सप्टेंबर 2023 पर्यंत अर्ज करु शकता. चला तर मग जाणून घेऊया या पॉलिसीचे नाव आणि त्याची खासियत काय आहे-

23 जूनपासून लाभ घेता येईल

सार्वजनिक क्षेत्रातील विमा कंपनी LIC ने शुक्रवारी 'धन वृद्धी' ही नवीन निश्चित मुदत विमा योजना सादर केली आहे. भारतीय आयुर्विमा महामंडळ (LIC) ने एका निवेदनात म्हटले आहे की, या विमा योजनेची सुरुवात 23 जूनपासून झाली आहे.

एलआयसीच्या मते, धन वृद्धी ही एक नॉन-लिंक्ड, नॉन-पार्टिसिपेटेड, वैयक्तिक, बचत आणि सिंगल प्रीमियम लाइफ प्लॅन आहे जी संरक्षण आणि बचत यांचे संयोजन देते.

मृत्यूनंतर कुटुंबाला पूर्ण पैसे मिळतील

पॉलिसी सुरु असताना धारकाचा मृत्यू झाल्यास, त्याच्या कुटुंबातील सदस्यांना आर्थिक मदत देण्याची तरतूद या योजनेत करण्यात आली आहे. त्याचबरोबर मुदतपूर्तीचा कालावधी पूर्ण झाल्यावर हमीभाव देण्याची तरतूदही त्यात ठेवण्यात आली आहे.

किती वर्षांसाठी पॉलिसी घेऊ शकतो?

ही योजना 10, 15 आणि 18 वर्षांच्या कालावधीसाठी उपलब्ध आहे. हे 1.25 लाख रुपयांची किमान मूलभूत निश्चित रक्कम देते जी 5,000 रुपयांच्या पटीत देखील वाढवता येते.

कर सवलतीचा लाभ मिळेल

या प्‍लॅनमध्‍ये प्रवेश करण्‍याचे कमाल वय 32 ते 60 वर्षे कालावधी आणि पर्यायानुसार आहे. या योजनेचे गुंतवणूकदार (Investors) ते कधीही सरेंडर करु शकतात आणि 80C अंतर्गत 1.5 लाख रुपयांपर्यंतची कर सूट देखील मिळवू शकता.

सिंगल प्रीमियम पॉलिसी

तसेच, ही पॉलिसी जीवन विमा सिंगल-प्रिमियम पॉलिसी आहे. ही पॉलिसी मुदतीदरम्यान बचत आणि संरक्षण यांचे संयोजन देते. लाइफ इन्शुरन्स ऑफ इंडियाच्या वेबसाइटनुसार, ही पॉलिसी 1,000 रुपयांच्या विमा रकमेवर 75 रुपयांपर्यंत अतिरिक्त हमी देते.