पेडणे: मोपा परिसरात गेले दोन दिवस धुमाकूळ घालणाऱ्या ‘ओंकार’ हत्तीने स्थानिक ग्रामस्थ आणि वन खात्याच्या अधिकाऱ्यांची अक्षरशः झोप उडवली होती. अखेर सोमवारी पहाटेपासून सुरू झालेल्या रोमहर्षक मोहिमेत या भल्या मोठ्या हत्तीला महाराष्ट्राच्या हद्दीत परतवण्यात वन खात्याच्या पथकाला यश आले.

खात्याच्‍या कर्मचाऱ्यांनी तब्बल दोन दिवस जीव ओतून केलेल्या प्रयत्नांत ॲटम बॉम्ब वाजवले, फटाके लावले, मोठ्या आवाजाने जंगल दणाणून सोडले...आणि शेवटी ‘ओंकार’ने महाराष्ट्राच्या दिशेने वाट धरली.

पहाटेच सुरू झालेल्या मोहिमेत सुरुवातीला हत्ती वन खात्याच्या प्रयत्नांना प्रतिसाद देत होता. तो महाराष्ट्राच्या हद्दीकडे निघालाही, पण अचानक आडवे आले पाण्याचे कालवे! त्यामुळे हत्तीने थोडा वेळ कुरघोडी केली. मात्र, वनकर्मचाऱ्यांचा पिच्छा सुरूच राहिला.

शेवटी, पाटाजवळून मार्ग काढत हा हत्ती सिंधुदुर्गातील खोलबाग-नेतर्डे या सीमावर्ती गावात शिरला. सकाळी सहाच्या सुमारास त्याने सरळ महाराष्‍ट्राचा मार्ग धरला.