कोडार येथे आयआयटी प्रकल्प नको म्हणून ग्रामस्थ एकवटले आहेत. याआधी सत्तरीतील शेळावली, काणकोणातील लोलये आणि सांगे येथे आयआयटी संकुल प्रकल्पाला विरोध झाला आहे. रिवण येथे जमीन मालकीबाबत कागदपत्रे व्यवस्थित नसल्याने तेथे तो प्रकल्प होऊ शकला नाही. आता कोडार परिसरात कोमुनिदाद जमिनीवर तो प्रकल्प करण्याचा प्रयत्न सुरू झाला असतानाच त्याला विरोध होऊ लागला आहे.

राज्यात आयआयटी प्रकल्पाला विरोध होण्यामागे कोणाची फूस, असा विषय आता जोरदारपणे चर्चेला आलेला आहे. मुख्यमंत्री डॉ. प्रमोद सावंत यांनी आज दुपारी मंत्रालयात पत्रकारांशी बोलताना या विरोधाला कोणाची तरी फूस असल्याचा आरोप केला आहे.

मुख्यमंत्र्यांचे या विरोधाकडे लक्ष वेधल्यावर त्यांनी कोणाची तरी फूस असल्यावरून हा विरोध होत असल्याचा आरोप केला. राष्ट्रीय प्रकल्प गोव्यात नकोत, अशा मनोवृत्तीचे काहीजण असल्याचेही त्यांनी नमूद केले.