डिचोली: खासगी कंपन्या आदी विविध आस्थापनांमध्ये नोकऱ्या उपलब्ध असतात. मात्र, सरकारी नोकरीच हवी, या हट्टापायी खासगी नोकऱ्यांसाठी बेरोजगार युवक पुढे येत नाहीत. त्यांच्यात अनास्था दिसून येत आहे, अशी खंत मुख्यमंत्री डॉ. प्रमोद सावंत यांनी व्यक्त करुन सरकार कोणालाही घरबसल्या नोकरी देऊ शकत नाही. त्यासाठी बेरोजगार युवकांनी रोजगार भरती मेळाव्यात सहभागी व्हायला हवे, असेही सांगितले.

युवकांनी केवळ सरकारी नोकरीच्या मागे न लागता अगोदर विविध आस्थापनांनी उपलब्ध असलेल्या नोकरीच्या संधीचा लाभ घ्यावा. आणि त्यानंतरच पुढच्या भवितव्याचा विचार करावा. युवकांनी आपल्यातील कौशल्य विकसित करावे, असे आवाहनही मुख्यमंत्र्यांनी केले.

डिचोलीत आयोजित केलेल्या 'रोजगार भरती' मेळ्याचे (जॉब प्लेसमेंट फेर) उद्घाटन केल्यानंतर मुख्यमंत्री डॉ. सावंत प्रमुख पाहुणे या नात्याने बोलत होते. सेवा पंधरवड्यानिमित्त सोमवारी येथील छत्रपती शिवाजी महाराज सरकारी शाळा संकुलात कौशल्य विकास संचलनालयातर्फे हा रोजगार भरती मेळावा आयोजित केला होता.

याप्रसंगी डिचोलीचे आमदार डॉ. चंद्रकांत शेट्ये, मयेचे आमदार प्रेमेंद्र शेट, कौशल्य विकास संचालक एस. गावकर आणि उद्योजक हरीश मेलवानी उपस्थित होते.

43 कंपन्यांचा सहभाग

डिचोलीत आयोजित केलेल्या रोजगार भरती मेळ्ळ्यात ४३ कंपन्यांनी सहभाग घेतला होता. या आस्थापनांनी मिळून ३५२ नोकऱ्या उपलब्ध आहेत. या रोजगार भरती मेळाव्यात डिचोली आणि होंडा येथील औद्योगिक प्रशिक्षण केंद्रातील मिळून १०० हून अधिक प्रशिक्षणार्थी सहभागी झाले होते. या प्रशिक्षणार्थीच्या विविध आस्थापनांकडून मुलाखती घेण्यात आल्या