गावकऱवाडा-वेळगे येथे शनिवारी संध्याकाळी रुक्मिणी बोम्बडो गावडे यांच्या घराला संध्याकाळी ५.३० च्या सुमारास अचानक आग लागून मोठ्या प्रमाणात नुकसान झाले. आग लागण्याचे कारण अद्याप स्पष्ट झालेले नाही. गावकऱ्यांनी आग विझवण्याचा प्रयत्न केला. मात्र, घर कौलारू असल्याने आगीने क्षणात रौद्र रूप धारण केले. याची माहिती मिळताच वाळपई अग्निशमन दलाने तातडीने घटनास्थळी धाव घेतली.

अग्निशमन दलाच्या जवानांनी अथक प्रयत्नांनंतर आग आटोक्यात आणली. घरातील दोन गॅस सिलिंडर सुरक्षितपणे बाहेर काढण्यात दलाला यश आले. मात्र घरातील बहुतेक साहित्य जळून खाक झाले. रुक्मिणी या आर्थिकदृष्ट्या दुर्बल असल्याने घर जळाल्याने त्यांच्यावर मोठे संकट कोसळले आहे. पोलिसांनी घटनास्थळी भेट देऊन पंचनामा केला. आगीत झालेले नुकसान आणि वाचवलेले साहित्य यांचा तपशील अद्याप जाहीर केलेला नाही.