डिचोली: महाराष्ट्र व गोवा सीमेलगतच्या दोडामार्ग परिसरात पट्टेरी वाघाचा संचार असल्याचे स्पष्ट झाले आहे. दोडामार्ग तालुक्यातील हडफडे भागातील जंगल परिसरात हा वाघ भ्रमण करताना तेथील वन्यजीव अभ्यासकांच्या निदर्शनास आला आहे.

दरम्यान, दोडामार्ग भागात दर्शन दिलेला हा पट्टेरी वाघ म्हादई अभयारण्यातील आहे, असा दावा पर्यावरण अभ्यासकांनी केला आहे. गोव्यातील पर्यावरणप्रेमी आणि वन्यजीव अभ्यासक राजेंद्र केरकर यांनीही तसा ठाम दावा केला आहे.

चार दिवसांपूर्वी म्हणजेच गेल्या शुक्रवारी जंगल परिसरातून भ्रमंती करताना वन्यजीव अभ्यासक दर्शन वेंगुर्लेकर आणि त्याच्या साथीदारांना वाघ भ्रमण करताना आढळून आला. गेल्या मार्च महिन्यातही वाघाचे दर्शन झाले होते, अशी माहिती मिळाली आहे.

सिंधुदुर्ग भागात वाघ असणे ही निसर्ग संवर्धनाच्यादृष्टीने समाधानकारक बाब आहे. समृद्ध जंगलातच वाघाचा संचार असतो. असा वन्यजीव अभ्यासकांचा दावा आहे. दरम्यान, गोव्यासह महाराष्ट्र आणि कर्नाटक सरकारने व्याघ्र संवर्धनासाठी संयुक्तपणे पुढाकार घ्यावा, अशी मागणी गोव्यातील पर्यावरण आणि वन्यजीव अभ्यासक राजेंद्र केरकर यांनी केली आहे.

वाघ म्हादई अभयारण्यातील

दोडामार्ग येथील जंगल परिसरात आढळून आलेला वाघ म्हादई अभयारण्यातील आहे. महाराष्ट्रातील वन्यजीव अभ्यासक आणि तज्ज्ञांशी संपर्क करून माहिती मिळवली असता हा वाघ म्हादई अभयारण्यातील असल्याचे स्पष्ट होत आहे. महाराष्ट्रातील डेटा बेसमध्ये या वाघाविषयी माहिती उपलब्ध नाही. सावंतवाडी ते दोडामार्ग भागात वाघांचे अस्तित्व आहे. आंबेली ते तिळारीपर्यंतच्या भ्रमण मार्गात एकूण आठ वाघ आहेत. वाघ एकाचवेळी ५० किलोमीटर पर्यंत भ्रमण करतात. असे वन्यजीव अभ्यासक प्रा. राजेंद्र केरकर यांनी सागितले.