राज्यात रितसर भाडेकरु पडताळणी होत नसल्याबाबत विधानसभेत सर्व पक्षीय आमदारांनी नाराजी व्यक्त केली. याबाबत आलेक्स रिजेनाल्ड लॉरेन्स यांनी खासगी सदस्य ठराव मांडला. राज्यातील भाडेकरुंची पडताळणी होत नसल्याने बाहेरुन येणारे नागरिक राज्यात हवी तशी कामे करुन गोव्याचे नाव मलिन करतात. तसेच, काही गुन्हेगारी उद्देशाने येणारे नागरिक देखील याचा गैरफायदा घेतात.

यावर अंकूश ठेवण्यासाठी राज्यात भाड्याने राहणाऱ्या परराज्यातील नागरिकांची भाडेकरु पडताळणी करावी अशी मागणी या ठरावाच्या माध्यमातून करण्यात आली. या ठरावाला सर्वपक्षीय आमदारांनी समर्थन दिले. याबाबत विधेयक येत्या अधिवेशनात मांडण्याचे आश्वासन दिल्यानंतर ठराव मागे घेण्यात आला.