पणजी: दोन दिवसांपूर्वी ताळगावातील शेतातील गवताला आग लागण्याची घटना ताजी असतानाच बुधवारी दुपारी पावणेदोनच्या सुमारास पुन्हा गवताला आग लागून भीतीचे वातावरण निर्माण झाले. ही आग मोठ्या प्रमाणात फैलावण्यापूर्वीच अग्निशमन दलाच्या जवानांनी तसेच तेथील स्थानिक लोकांनी विझविण्यास मदत केल्याने ती सुमारे एका तासानंतर आटोक्यात आणण्यात यश आले. वारंवार लागणाऱ्या या शेतातील आगीमुळे आजूबाजूला निवासी संकुलामधील लोकांमध्ये चिंतेचे वातावरण पसरले आहे. गवताला ही आग लागण्यामागील कारणे काय, हेही एक कोडेच आहे.

ही आग रस्त्यापासून बरीच आतमध्ये शेतजमिनीतील गवताला लागल्याने त्या ठिकाणी पाण्याचा बंब नेणे अशक्य होते. त्यामुळे या बंबामधील पाणी तसेच शेतामध्ये असलेल्या विहिरीतील पाणी बादल्यांमधून भरून आग लागलेल्या ठिकाणी नेण्यासाठी दलाच्या जवानांनी तसेच काही ग्रामस्थानी मदत केली. सुमारे एक तासाच्या अथक प्रयत्नानंतर ही आग आटोक्यात आली. मात्र, या आगीमुळे तेथील केळींच्या झाडानाही झळ बसली.