फोंडा: कोडली ते फोंडा या मार्गावर गेल्या काही काळापासून कोणतीही सार्वजनिक बससेवा उपलब्ध नाही. यामुळे विशेषतः शाळा आणि कॉलेजला जाणाऱ्या विद्यार्थ्यांना रोजच्या प्रवासात गंभीर अडचणींना सामोरे जावे लागत आहे. बससेवा सुरू करण्यासाठी स्थानिक ग्रामस्थांनी एक वर्षापूर्वीच संबंधित विभागाला लेखी पत्र दिले होते. मात्र आजतागायत कोणताही प्रतिसाद मिळालेला नाही, अशी माहिती ग्रामस्थांनी दिली आहे.

या मार्गावर शासकीय परिवहन म्हणजेच कदंब बससेवा पूर्णपणे बंद असल्यामुळे, विद्यार्थी, नोकरदार आणि वयोवृद्ध नागरिक यांना खासगी वाहनांवर अवलंबून राहावं लागत आहे. अनेक वेळा विद्यार्थ्यांना वेळेवर शाळेत पोहोचणं कठीण होतं, तर काहींना 5-6 किमी अंतर चालत जावं लागतं. पावसाळ्यात आणि उन्हाच्या कडाक्यात ही परिस्थिती अधिकच त्रासदायक ठरते.

“एक वर्ष उलटून गेलं तरी आमच्या मागणीचा काहीच विचार झालेला नाही. सकाळी ७ वाजेपर्यंत तरी किमान एक कदंब बस सोडावी, ही आमची मागणी आहे,” असं स्थानिकांनी सांगितलं.