पणजी: जुने गोवेस्थित एला येथील मत्स्यपालन फार्ममध्ये पायलट प्रकल्पांतर्गत उत्पादित केलेल्या पांढऱ्या कोळंबींची आज धडाक्यात विक्री करण्यात आली. मत्स्यव्यवसाय खात्यातर्फे शुक्रवारी दुपारी पणजीतील कार्यालयात कोळंबी विक्रीसाठी उपलब्ध केली होती. कोळंबी खरेदीसाठी कार्यालयाबाहेर मोठी रांग दिसून आली.

प्रतिकिलो ३५० रुपये दर असलेल्या या कोळंबीची विक्री ‘प्रथम येणाऱ्यास प्राधान्य’ या तत्त्वावर करण्यात आली. प्रत्येक व्यक्तीला जास्तीत जास्त २ किलो खरेदी करण्याची परवानगी होती. विभागाच्या मत्स्यपालन पायलट उपक्रमाचा भाग म्हणून सुमारे २०० किलो कोळंबी शुक्रवारी विक्री करण्यात आली. त्यामुळे अवघ्या काही तासांत या खात्याने ७० हजारांचा महसूल प्राप्त केला. कोळंबी विक्री करण्यात येणार असल्याची माहिती मत्स्यपालन खात्याने प्रसार माध्यमांवर प्रसारित केल्याने नागरिकांनी खरेदीसाठी मोठी गर्दी केल्याचे दिसून आले.