मडगाव: नवसाला पावणारी देवी म्हणून प्रसिद्ध असलेल्या फातर्पा येथील श्री शांतादुर्गा कुंकळ्‍ळीकरीण देवस्थानचा जत्रोत्सव गुरुवार २५ डिसेंबरपासून सुरू होणार असून ३० डिसेंबर रोजी महारथ मिरवणुकीनंतर या उत्सवाची सांगता होणार आहे. या पाच दिवसांत लाखो भाविक या जत्रोत्सवात सामील होणार असून भाविकांसाठी ती एक पर्वणी ठरेल.

श्री शांतादुर्गा कुंकळ्‍ळीकरीण देवस्थान समितीचे अध्यक्ष विनोद यशवंत देसाई यांनी पत्रकार परिषदेत ही माहिती दिली. यावेळी सचिव गुणेश  गोपीनाथ देसाई, खजिनदार महेन्द्र प्रभाकर देसाई तसेच मुखत्यार बोंबों नारायण देसाई हे उपस्थित होते.

पौष शुद्ध पंचमी (२५ डिसेंबर) पासून हा जत्रोत्सव सुरू होत असून त्या दिवशी सकाळी देवीचा महाभिषेक व रात्री १२ वांगड्यांच्या उपस्थितीत विधिपूर्वक नमन घालून या उत्सवाची सुरुवात होणार आहे. त्यानंतर शिबिकोत्सव आणि जागर होणार आहे.

२६ डिसेंबर रोजी रात्री देवीची अंबारी रथातून, २७ डिसेंबर रोजी फुलांच्या रथातून तर २८ रोजी विजय रथातून मिरवणूक होणार आहे. २९ रोजी रात्री जागर व शिबिकोत्सव झाल्यानंतर दुसऱ्या दिवशी म्हणजे ३० डिसेंबर रोजी पहाटे सहा वाजता महारथातून मिरवणूक होणार असून हा सोहळा पाहण्यासाठी हजारो भाविक फातर्पा येथे जमणार आहेत.