वास्को: येथील प्रसिद्ध श्री दामोदर भजनी सप्ताह यंदा १२६वे वर्ष साजरे करत आहे. या सप्‍ताहास बुधवारी ३० जुलैपासून सुरवात होणार असून तयारी युद्धपातळीवर सुरू झाली आहे. भजनी सप्ताह उत्सव समितीने आपले गायक कलाकार जाहीर केले आहेत. समितीतर्फे उद्योजक श्रीपाद शेट्ये व संजय शेट्ये यांच्या सौजन्याने प्रसिद्ध गायक विश्‍‍वजीत बोरवणकर यांची खास मैफल सप्ताहाच्या पूर्वरात्री रंगणार आहे.

श्री दामोदर मंदिरासमोर भव्य मंडप उभारण्याबरोबरच गायनाच्या मैफलींसाठी शहरात अनेक ठिकाणी मंडप उभारण्यात येत आहेत. मुरगाव पालिका व वीज खात्याने कामाला सुरवात केली आहे. मंगळवारी २९ रोजी संध्याकाळी ७ वाजता मंदिरासमोर उभारण्यात आलेल्या मंडपात विश्‍‍वजीत बोरवणकर यांचा संगीत कार्यक्रम होणार आहे.