डिचोली: वयस्‍कर आईचा आशीर्वाद घेऊन व ‘मम्मी, मी येतो’ असे सांगून शिरगावच्या श्री लईराई देवीच्या जत्रेला गेलेला माठवाडा-पिळगाव येथील धोंड भक्त सागर नंदुर्गे (वय ३० वर्षेे) हा युवक पुन्हा घरी परतलाच नाही. चेंगराचेंगरीत त्‍याच्‍यावर क्रूर काळाने झडप घातली.

सागर याच्यामागे वयोवृद्ध आई आणि एक बहीण (विवाहित) आहे. सागर हा एकुलता एक मुलगा आणि बहिणीचा लाडका भाऊ. शिरगाव येथील दुर्घटनेत सागरचा बळी गेल्याने त्याच्या वाटेकडे डोळे लावून बसलेल्या आईवर दुःखाचा डोंगर कोसळला आहे. आता मला ‘मम्मी’ म्हणून कोण हाक मारणार, असा तिचा आक्रोश काळीज पिळवटून टाकत आहे. या दुर्घटनेत माठवाडा-पिळगाव येथील पाच धोंड भक्तगण जखमी झाल्याचे सांगण्यात आलेे.