वाळपई: सत्तरीत पावसाचा जोर तसा कमी असला तरी जोरदार वाऱ्यामुळे मोठ्या प्रमाणात पडझड होण्याचे सत्र सुरुच आहे. मंगळवारी संध्याकाळी सोनाळ येथील रुक्मिणी गावस यांच्या घरावर भले मोठे सायल्याचे झाड पडून घरावर तसेच शेडवर पडून शेडखाली असलेली कार व स्कूटरचे मोठे नुकसान झाले.

वाळपई अग्निशमन दलाला कळविल्यानंतर जवानांनी तातडीने घटनास्थळी धाव घेऊन मदत कार्य केले. यात एकूण दीड लाखाच्यावर मालमत्तेचे नुकसान झाले असून सुमारे तीन लाखाची मालमत्ता जवानांना वाचविण्यास यश आले.अग्निशमन दलाचे सतीश नाईक, अरविंद देसाई, दत्ताराम देसाई, रूपेश सालेलकर, अदम खान, गोकुळदास देगवेकर, फटी सलमिश्कर आदी जवानांनी मदत कार्य केले.

खडकी येथे श्रीराम हायस्कूलजवळ रस्त्यावर आणि वीज वाहिनीवर जंगली झाड पडून नुकसान झाले. केरी येथील अंजुणे धरणे येथील चोर्ला बेळगाव मार्गावर रस्त्यावर व वीज केबलवर रानटी झाड पडून नुकसान झाले. सातोडे येथे रस्त्यावर कोकमचे झाड पडले. रिवे येथे रस्त्यावर आणि वीज वाहिनीवर रानटी झाड पडून नुकसान झाले. सोनाळ येथील मारुती मंदिराजवळ आंब्याचे झाड पडले. अग्निशमन दलातर्फे टप्प्याटप्प्याने घटनास्थळी धाव घेऊन मदत कार्य केले.