साखळी: हिट अँड रन अपघातात एका व्यक्तीचा मृत्यू झाल्याची दुर्दैवी घटना काल बुधवारी (५ मार्च) घडली आहे. आदर्श प्रभाकर मुरगुड (28) असं मृत तरुणाचं नाव आहे. अज्ञात वाहनानं जोरदार धडक दिल्यानंतर आरोपी चालक घटनास्थळावरून फरार झाला. बेळगाव येथील आदर्श प्रभाकर मुरगुड हा तरुण आपल्या दुचाकीवरून डिचोली येथून साखळीच्या दिशेनं जात असताना समोरून येणाऱ्या कारनं त्याच्या दुचाकीला धडक दिली.

अपघातात दुचाकीचालक आदर्श गंभीर जखमी झाला, त्याला तत्काळ रुग्णालयात उपचारासाठी दाखल केले असता, उपचारापूर्वीच मृत्यू झाल्याचं डॉक्टरांनी घोषित केलं. या अपघातानंतर मदत करण्याऐवजी कारचालकानं घटनास्थळावरून पळ काढला.डिचोली पोलिसांनी घटनेचा तपास करत फरार कारचालकाला कारसह ताब्यात घेतलं आहे. समीर मधुकर पाटील असं ताब्यात घेतलेल्या कारचालकचं नाव आहे.