सांगे: चानीमळ, कष्टी, काले येथील बंद चिरेखाणीत साठवलेला औद्योगिक वसाहतीतील प्लास्टिक कचऱ्याला शनिवारी लागलेली आग अजूनही धुमसत आहे. प्रशासनाच्या म्हणण्यानुसार ८० टक्के आग पाणी आणि मातीचा भराव घालून विझविण्यात आली. शिल्लक काम उद्यापर्यंत पूर्णपणे आटोक्यात येईल, असा विश्वास सांगेचे उपजिल्हाधिकारी मिलिंद्र वेळीप यांनी व्यक्त केला. तसेच दोषींवर योग्य कारवाई करण्याचे निर्देश कुडचडे पोलिसांना दिल्याचे त्यांनी सांगितले.

गेल्या तीन दिवसांपासून धुमसणाऱ्या आगीवर उपाययोजनेसाठी सांगेचे प्रशासन धावपळ करीत आहे. एका बाजूने रासायनिक धूर व दुसऱ्या बाजूने धुराने त्रस्त झालेले ग्रामस्थ एकाच वेळी आकांडतांडव करीत असताना उपजिल्हाधिकारी आपल्या पद्धतीने ग्रामस्थांना आश्वस्त करीत होते.

आग लागलेल्या ठिकाणापासून जवळपासची लोकवस्ती इतरत्र नागरिक, नातेवाईक यांच्या घरी स्थलांतर झाले आहे. रासायनिक धूर अत्यंत उग्र असल्याने आगीच्या ठिकाणी तसेच गावातील लोकांनी मास्क वापरावे लागले. लोक पंचायत मंडळाला दोषी ठरवीत आहे. सरपंच बबन गावकर म्हणाले की, कचऱ्याचा ढीग पाहता ही घटना कालची नसून किमान चार पाच वर्षांपासून प्लास्टिक कचरा साठविला जात असावा. मात्र या संदर्भात एकही लेखी तक्रार ग्रामस्थांनी पंचायतीला दिली असल्याची नोंद पंचायत कार्यालयात नसल्याचे ते म्हणाले.