पणजी: राज्‍य सरकार आदिवासींच्या जमिनी हडप करण्यास निघाले आहे. यासाठी हेतूतः आदिवासी बहुल भाग करत आहे, असा आरोप चिंबलच्या जैव विविधता समितीचे अध्यक्ष गोविंद शिरोडकर यांनी केला. गोमन्तकचे संपादक संचालक राजू नायक यांनी त्यांची सडेतोड नायक सदरात गोमन्तक टीव्हीसाठी आज मुलाखत घेतली. या मुलाखतीत त्यांनी हा आरोप केला.

गेल्या २४ दिवसांत एकाही आदिवासी मंत्री आमदाराने साधा पाठिंबा देण्यासाठीही भेट दिली नाही, अशी खंत त्यांनी व्यक्त केली. तोयार तळे वाचवणे म्हणजे परिसरात राहणाऱ्या आदिवासी समाजाला वाचवण्यासारखे आहे. आमचे अस्तित्वच त्यावर अवलंबून आहे. वाढत जाणारी खासगी वस्ती, चिंबलच्या पठारावरून काढलेला महामार्ग ही संकटे आम्ही झेलत असताना सरकारने हे संकट आमच्‍यासमोर उभे केले आहे. आम्ही याआधी सरकारला युनिटी मॉल व प्रशासन स्तंभ या प्रकल्पांना विरोध कायम असेल याची कल्पना दिली आहे. चर्चा करता येईल पण आम्ही आमच्या भूमिकेपासून माघारी येऊ असा त्याचा अर्थ होत नाही, असे त्यानी सांगितले.

विविध आमिषे....

ते म्हणाले, तळ्याच्या प्रभाव क्षेत्रात कोणतेही बांधकाम नको असे आमचे म्‍हणणे आहे. हा आदिवासी समाज वाचवण्याचा व्यापक लढा आहे. केवळ तो एका प्रकल्पाला विरोधापुरता मर्यादित नाही. ५० हजार चौरस मीटर जमिनीवर कॉंक्रीट घातल्यानंतर तळे टिकेल का याचा विचार कोणीही करावा. जिल्ह्यातील एक उत्पादन विकण्यासाठी मॉलची गरज नाही असे आमचे म्हणणे आहे, त्यावर आम्ही ठाम आहोत. आपल्याला या लढ्यातून बाहेर पडण्यासाठी काही जणांनी विविध आमिषेही दाखवली होती, असा आरोपही त्यांनी केला.