रणजी कंरडक क्रिकेट स्पर्धेत गोव्याच्या फलंदाजांनी अफलातून कामगिरी केली. त्यांच्या या कामगिरीचे राज्यासह देशभरातून कौतुक होत आहे. कश्यप बखले आणि स्नेहल कवठणकर यांनी तिसऱ्या विकेटसाठी अरुणाचल प्रदेशविरुद्ध 606 धावांची भागिदारी केली. रणजी स्पर्धेच्या नव्वद वर्षांच्या इतिहासातील ही सर्वात मोठी धावसंख्या या दोन दिग्गजांनी उभारली. यातच आता, राज्याचे वीजमंत्री सुदीन ढवळीकर यांनी कश्यप आणि स्नेहल यांचे तोंडभरुन कौतुक केले. कश्यप आणि स्नेहल यांनी केलेल्या कामगिरीचा मला गर्व आहे. यापुढेही त्यांनी अशीच कामगिरी करावी, असे ढवळीकर म्हणाले. तसेच, टी-20 आणि वनडे क्रिकेटमध्येही त्यांनी आपल्या अफलातून फलंदाजीच्या माध्यमातून जलवा दाखवून द्यावा, असेही ते पुढे म्हणाले.