पणजी: देशाचे पंतप्रधान आणि मुख्यमंत्री यांच्या मार्गदर्शनाखाली राज्यभरात ‘रेबिज वॅक्सिनेशन अँड स्टॅबिलायझेशन’ ही मोफत लसीकरण मोहीम राबवली जात आहे. महाराष्ट्र सीमेलगत असल्याने धोका टाळण्यासाठी आणि रेबिज नियंत्रणासाठी सरकारने मोठ्या प्रमाणात उपाययोजना केल्या असून बार्देश तालुक्यात ही मोहीम मोठ्या प्रमाणात राबवली जाणार असल्याची माहिती मंत्री नीळकंठ हळर्णकर यांनी मंत्रालयात घेतलेल्या पत्रकार परिषदेत दिली.

बार्देश तालुका मोठा असल्याने येथे मोहीम पूर्ण झाल्यानंतर इतर ठिकाणीही ती हाती घेतली जाणार आहे. कोलवाळ येथील श्रीराम विद्यामंदिर येथे उद्यापासून मोहिमेची सुरवात होईल. मोहिमेचा कालावधी आठ दिवस असला, तरी शक्य तितक्या मोठ्या प्रमाणावर लसीकरण पूर्ण करण्याचा प्रयत्न आहे, असेही मंत्र्यांनी स्पष्ट केले.

राज्यातील भटक्या कुत्र्यांची वाढती संख्या लक्षात घेऊन डब्ल्यूव्हीएस आणि एमआर संस्थांच्या सहकार्याने कुत्र्यांचे स्टरलायझेशन आणि लसीकरण केले जात आहे. यासाठी जवळपास १५०० जणांचे मनुष्यबळ तैनात केले जाणार आहे. या मोहिमेत १२ आंतरराष्ट्रीय तज्ज्ञ तसेच १९ स्वयंसेवकांचा समावेश असून,विशेष प्रशिक्षित

कर्मचारी गणवेशात कार्यरत असतील. त्यामुळे नागरिकांनी सहकार्य करावे, असे आवाहन करण्यात आले आहे. राज्यात ही मोहीम राबविण्यासाठी मोठ्या प्रमाणावर निधीची गरज असून सरकारकडे पुरेसा निधी उपलब्ध असल्याचे मंत्री हळर्णकर यांनी स्पष्ट केले. दरवर्षी या मोहिमेसाठी २ कोटी रुपये मंजूर होत असून अनेक बिगर सरकारी संस्था देखील सक्रियपणे या कार्यात मदत करत आहेत.