Quelossim Gramsabha

सासष्टी: केळशी ग्रामसभेत आज कार्यक्षेत्रातील बांधकामांवरून दोन गटांमध्ये शाब्दिक चकमक झाल्याने पोलिसांना पाचारण करावे लागले. माजी क्रिकेटपटू आशिष नेहरा याने पंचायतीची परवानगी न घेता रस्ता बांधल्याचे यावेळी सांगण्यात आले. पंचायतीने त्याला पत्र लिहून हे बांधकाम बेकायदेशीर असल्याचे व ती जागा पूर्ववत करण्यास सांगितले आहे. या ग्रामसभेत ‘सनबर्न’ला विरोध दर्शविणारा तसेच रोमी कोकणीला समान दर्जा देण्याचा ठराव मंजूर करण्यात आला.

सरपंच डिक्सन वाझ म्हणाले की, ज्या लोकांना गावाबद्दल प्रेम आहे, ते आज उपस्थित होते. आम्हाला गावाचा विकास हवा; पण तो शाश्वत असावा. कित्येकांनी दहा-पंधरा वर्षांपूर्वी येथे जागा विकत घेतल्या आहेत. आता तिथे ते काय करणार, हे आम्ही सांगू शकत नाही. केळशी किनाऱ्यावर शॅक, वॉटर स्पोर्टस आहेत; शिवाय मच्छीमारांना किनाऱ्यावर ये-जा करण्यासाठी त्यांच्या जमिनीतून पूर्वीपासूनची पायवाट आहे. त्यामुळे जे कोण आपल्या जमिनीत बांधकाम करणार आहेत, त्यांनी प्रथम पंचायतीकडून परवानगी घ्यावी, तसेच लोकांना ये-जा करण्यासाठी जागा सोडावी, असा निर्णय बैठकीत झाला.