Priol Cuncoliem Mardol Local Oppose Mega Housing Project

मडकई: प्रियोळ मतदारसंघातील कुंकळ्ये गावात जमिनीचे भूखंड पाडून ते विकण्यास स्थानिकांनी तीव्र विरोध केला. तर, बेताळभाटीतही ग्रामस्‍थांनी मेगा प्रकल्‍पांना विरोध करताना त्‍याविरोधात कठोर भूमिका घेतली.यासंबंधी आज कुंकळ्ये येथील श्री केळबाई देवालयाच्या मंडपात घेतलेल्या पत्रकार परिषदेत स्थानिकांनी ठाम विरोध दर्शविला. तसेच कोणी भूखंड घेण्याचा प्रयत्न केल्यास तो हाणून पाडला जाईल, असा इशारा दिला. खुद्द ग्रामपंचायतीचा या प्रकाराला विरोध असल्याचे सांगण्यात आले. तसेच या विरोधाच्या प्रती संबंधित सरकारी खाती, स्थानिक आमदार, मुख्यमंत्री व राज्यपालांना देण्याचा निर्णय घेण्यात आला.

गर्भित इशाऱ्याचा फलकच टांगला वेशीवर

‘‘कोणी गावातील भूखंड विकत घेण्याचा प्रयत्न करत असेल तर ती त्यांची स्वतःची जबाबदारी असेल. अगोदर कल्‍पना दिली नाही, असे नंतर म्हणू नका’’ अशा आशयाचा फलकच गावच्या वेशीवर टांगला आहे. तसेच गंभीर परिणाम भोगावे लागतील, असा इशारा दिला.

काय आहे प्रकरण?

१. कुंकळ्ये येथील सुमारे ९९ हजार चौरस मीटर जमीन एका बांधकाम व्यावसायिकाला विकण्यात आली आहे. हा व्यावसायिक त्‍या जमिनीचे भूखंड पाडून ते विकण्याच्या तयारीत असल्याची कुणकुण कुंकळ्येवासीयांना लागली.

२. ६ रोजी गावात झालेल्या सभेत स्थानिकांनी अशा भूखंड विक्रीला तीव्र विरोध दर्शविला. अशा प्रकारे भूखंड पाडून ते विक्री केल्यास भलतेच लोक येऊन गावात स्थायिक होतील आणि येथील शांती, जलस्रोत नष्ट होतील अशी भीती व्‍यक्त केली.

३. ही बागायती जमीन असल्याने त्याचे रूपांतरण करणे शक्य नसल्याचे सांगण्यात आले. ९९ हजार चौरस मीटर जमिनीपैकी अवघीच काही जमीन भूरूपांतरित आहे. मात्र इतर सर्व जमीन बागायती आहे.