फोंडा: फोंडा पालिकेचा सोपो कर घेणाऱ्या कंत्राटदाराला सहा महिन्यांची मुदतवाढ देताना पालिका क्षेत्रातील धोकादायक इमारतींच्या मालकांना नोटिसा पाठवण्याबरोबरच मासळी मार्केटचा प्रश्‍न तसेच भटक्या कुत्र्यांचे निर्बिजीकरण करण्याचा निर्णय फोंडा पालिकेच्या आज (गुरुवारी) झालेल्या बैठकीत घेण्यात आला.

फोंडा पालिकेच्या या बैठकीच्या अध्यक्षस्थानी नगराध्यक्ष आनंद नाईक होते. यावेळी उपनगराध्यक्ष दीपा कोलवेकर तसेच इतर नगरसेवकांबरोबरच पालिका मुख्याधिकारी सुयश खांडेपारकर व इतर अधिकारी उपस्थित होते.

फोंडा पालिकेच्या सोपो कर गोळा करण्याच्या लीलावात कुणी सहभागी होत नाही, हे पाहून पालिकेने आहे त्याच कंत्राटदाराला आणखी सहा महिन्यांची मुदतवाढ दिली आहे. जून महिन्यात ही मुदत संपली असून नवीन कंत्राटदार पुढे येत नसल्याने आहे त्याच कंत्राटदाराला ही संधी पालिकेने दिली आहे.