शहरातील वाढती वाहतूक कोंडी आणि रस्ते अपघातांवर नियंत्रण मिळवण्यासाठी फोंडा पोलिसांनी वाहतूक नियम मोडणाऱ्यांविरुद्ध विशेष मोहीम तीव्र केली आहे. गेल्या काही दिवसांपासून पोलिसांनी शहराच्या विविध नाक्यांवर तपासणी वाढवून दंडात्मक कारवाईचा धडाका लावला आहे. विशेषतः विनाहेल्मेट दुचाकी चालवणे, ट्रिपल सीट प्रवास, मद्यपान करुन वाहन चालवणे आणि काळया काचांचा वापर करणाऱ्यांवर पोलिसांची करडी नजर आहे. फोंडा वाहतूक पोलिसांनी ठिकठिकाणी नाकाबंदी करुन शेकडो वाहनांची तपासणी केली असून मोठ्या प्रमाणात दंड वसूल केला आहे. रस्ते सुरक्षा नियमांचे पालन करण्याचे आवाहन करतानाच नियम मोडणाऱ्यांवर यापुढेही कडक कारवाई सुरु राहील, असा इशारा फोंडा पोलिसांनी दिला.