पेडणे : गेली अनेक वर्षे रखडलेल्या तुये येथील गोवा वैद्यकीय महाविद्यालय (गोमेकॉ) संलग्न इस्पितळाचे उद्‌घाटन मुख्यमंत्री डॉ. प्रमोद सावंत यांच्या हस्ते करण्यात आले. कार्यक्रमाच्‍या निमित्ताने ‘आम्‍ही सर्व एकदिलाने पुढील विधानसभा निवडणुकीसाठी काम करू’, असे प्रतिपादन आरोग्‍यमंत्री विश्‍‍वजीत राणे यांनी केले. तर ‘तुये येथे भव्‍य वैद्यकीय महाविद्यालय उभे राहील’, अशी घोषणा मुख्‍यमंत्री सावंत यांनी केली.

यावेळी मुख्यमंत्री डॉ. प्रमोद सावंत यांनी तुये इस्पितळ गोमेकॉशी संलग्न असून आजपासून येथे १३ ओपीडी सुरू करण्यात आल्या आहेत. तसेच एक्स-रे, दंतचिकित्सा आदी सेवांसाठी डॉक्टरांची नेमणूक करण्यात आली असून संबंधित पदांसाठी अर्ज मागवण्यात आले आहेत. डॉक्टरांच्या वेतनात वाढ करण्यात आली असल्याची माहितीही त्यांनी दिली. पुढील तीन ते चार महिन्यांत शस्त्रक्रिया विभाग, अतिदक्षता विभाग व इतर सेवा सुरू करण्यात येतील, असे त्यांनी स्पष्ट केले.