मोरजी: ओंकार हत्ती गेले सात दिवस तांबोसे गावात ठाण मांडून आहे, शेतकऱ्यांचे अतोनात नुकसात चालवले आहे, मात्र एकही मंत्री, आमदार अजून येथे फिरकलेले नाही, याबाबत शेतकरी नाराजी व्यक्त करीत आहेत.

या ठिकाणी वनरक्षक हातात फटाके घेऊन या हत्तीला पिटाळून लावण्याचा प्रयत्न करीत असले तरी ओंकार हत्ती तांबोसे गावावर भलताच भाळलेला दिसत आहे. सध्या ज्या मळ्यात ओंकार ठाण मांडून आहे, त्या ठिकाणी मोठ्या प्रमाणात कवाथे, भातशेती, पोफळी आदी उत्पादन आहे. या ठिकाणी त्याला भरपूर खायला मिळते. खातो खातो आणि तीन ते चार तास एकाच जाग्यावर लोळत बसलेला असतो. त्यानंतर बाजूला असलेल्या तेरेखोल नदीत डुंबतो, असे येथील शेतकऱ्यांनी सांगितले. स्थानिक पंच दया गवंडी यांनी सांगितले की, ओंकार हत्तीने आतापर्यंत या भागातील शेती, बागायतींची बरीच नासाडी चालवली आहे. भीतीमुळे शेतकरी मळ्यातही जात नाहीत. एखाद्या वेळी दुर्घटना घडली तर त्याला जबाबदार कोण? सरकारला एखाद्याचा बळी हवा की काय, असा प्रश्‍नही त्यांनी उपस्थित केला.

ओंकार हत्तीचा बंदोबस्त करण्यासाठी वन खात्याची टीम शेतात ठाण मांडून आहे. ज्या ठिकाणी हत्ती लपून बसतो त्याच्या काही अंतरावरून हे कर्मचारी फटाके लावून त्याला पिटाळून लावण्याचा प्रयत्न करतात. परंतु मनुष्य दिसला की ओंकार पळत सुटतो. त्यामुळे वन कर्मचाऱ्याचे प्रयत्न अपुरे पडत आहेत, असे ग्रामस्थांनी सांगितले.