नवी दिल्ली : दीर्घकाळापासून भाजपच्या राष्ट्रीय अध्यक्ष निवडीचे भिजत घोंगडे पडल्याच्या पार्श्वभूमीवर पक्षाने राष्ट्रीय कार्यकारी अध्यक्षपदी बिहार सरकारमधील मंत्री नितीन नवीन यांची नियुक्ती केली आहे.

विद्यमान अध्यक्ष जे. पी. नड्डा यांची ते जागा घेतील. भाजप संसदीय मंडळाकडून नितीन नवीन यांची नियुक्ती करण्यात आली असल्याचे राष्ट्रीय सरचिटणीस अरुण सिंह यांनी प्रसिद्धीपत्रकाद्वारे सांगितले आहे.

उत्तर प्रदेशच्या प्रदेशाध्यक्षपदी पंकज चौधरी यांची नियुक्ती झाल्याच्या दिवशीच भाजपने आपला राष्ट्रीय कार्यकारी अध्यक्ष नेमला आहे, हे विशेष. बिहार विधानसभा निवडणुकीत नितीन यांनी पाटण्याच्या बांकीपूर मतदारसंघातून विजय मिळवला होता. त्यानंतर नितीशकुमार मंत्रिमंडळात त्यांची सार्वजनिक बांधकाम खात्याचे मंत्री म्हणून वर्णी लागली होती. भाजपचे दिवंगत नेते नवीन किशोर सिन्हा यांचे पुत्र असलेल्या नितीन यांच्या कारकिर्दीस अखिल भारतीय विद्यार्थी परिषदेमधून सुरुवात झाली होती. २०१० साली त्यांनी पहिल्यांदा विधानसभा निवडणुकीत विजय मिळवला. त्यानंतर बांकीपूर मतदारसंघातून ते सातत्याने प्रतिनिधित्व करत आहेत.