मोरजी: पेडणे मतदार संघातील माजी आमदार तथा माजी उपमुख्यमंत्री बाबू आजगावकर आणि विद्यमान आमदार प्रवीण आर्लेकर या दोघांमध्ये आरोप प्रत्यारोपाच्या फैरी झडत असल्यामुळे भाजपची इज्जत दोन्ही नेत्यांनी वेशीवर टांगली असल्याची चर्चा सध्या राज्यभर सुरू झाली आहे. दोघांनीही एकमेकांवर गांजा विकत असल्‍याचा आरोप केला आहे.

माजी उपमुख्यमंत्री बाबू आजगावकर यांनी यापूर्वी भाजपचे पेडणेचे विद्यमान आमदार प्रवीण आर्लेकर हे पुड्या विकत असल्याचा आरोप अधून मधून करत होते. त्याच अनुषंगाने आज कोरगावमध्ये एका नागरिकाचे घर कोसळल्यानंतर त्याला मदतीचा हात देण्यासाठी बाबू आजगावकर हे कोरगावमध्ये आले होते. त्या ठिकाणी त्यांनी आमदार प्रवीण आर्लेकर यांच्यावर सडकून टीका केली.

बाबू भ्रमिष्ट झालेत!

माजी उपमुख्यमंत्री बाबू आजगावकर यांचाच मुलगा डिस्कोमध्ये गांजा विकतोय, असा आरोप यावेळी प्रवीण आर्लेकर यांनी केला. पेडणे मतदारसंघातील कायदा-सुव्यवस्था कुठेच बिघडलेली नाही. जे ॲसिड प्रकरण घडलेले आहे, त्या संशयिताला २४ तासांच्या आत पेडणे पोलिसांनी पकडलेले आहे. मग कायदा-सुव्यवस्था कुठे बिघडली? असा सवाल करून माजी उपमुख्यमंत्री बाबू आजगावकर जे काही बोलतात ते त्यांचे त्यांनाच माहीत, ते भ्रमिष्ट झाले आहेत, असे आमदार प्रवीण आर्लेकर म्हणाले.

मी पुन्हा येईन: आजगावकर

पेडणे मतदार संघातील कायदा सुव्यवस्था कमजोर केल्याचा दावा करत पोलिसांची ही भीती राहिलेली नाही. ही प्रकरणे अशीच वाढत आहे. मोपा विमानतळावर एका कामगाराचा खून करण्यात आला. कोरगाव येथील एका पंच महिला सदस्याचा विनयभंग करून तिला मारहाण करण्यात आली. असे वेगवेगळे प्रकार घडत आहेत. कायदा सुव्यवस्था या मतदारसंघात राहिलेली नाही. आमदार प्रवीण आर्लेकर यांचा इतिहास बघितला, तर तो गांजा विकणारा माणूस, आमदारच अशा कृत्यांमध्ये सामील झाल्याचा आरोप यावेळी माजी आमदार बाबू आजगावकर यांनी केला. पेडणे मतदारसंघात २०२७ च्या निवडणुकीत मी पुन्हा येईन, असा दावाही बाबू आजगावकर यांनी केला.