बागा-हडफडे येथील बुलेट शोरूमजवळ, कर्मा मॉन्टेरो हॉटेलजवळ आज, रविवारी सकाळी ११ वाजून ०४ मिनिटांनी दोन मोठ्या डिझेल जनरेटरला भीषण आग लागल्याची घटना घडली. ओवरलोडिंगमुळे शॉर्ट सर्किट झाल्याने आग लागल्याचा प्राथमिक अंदाज आहे.

पिळर्ण अग्निशमन केंद्रातून मदतीसाठी बोलावणे आल्यानंतर, म्हापसा अग्निशमन केंद्राचे पथक तातडीने घटनास्थळी दाखल झाले. फायर फायटर सुरज शेटगावकर यांच्या नेतृत्वाखालील पथकाने हॉटेल कर्मचाऱ्यांच्या मदतीने वेगाने कार्यवाही केली. जवानांनी आग आटोक्यात आणून, ती शेजारच्या इमारतींपर्यंत पसरण्यापासून रोखले. सुदैवाने, या घटनेत कोणतीही जीवितहानी झाली नाही. मात्र, दोन्ही जनरेटरचे मोठे नुकसान झाले आहे. नुकसानीचा नेमका अंदाज घेण्यासाठी पुढील तपास सुरू आहे.