मडगाव शहरात टॅक्सी चालकांनी खासगी गाड्यांच्या बेकायदेशीर व्यावसायिक वापरांविरोधात आक्रमक पवित्रा घेतला आहे. मडगाव परिसरात खासगी नोंदणी असलेल्या तीन दुचाकी भाड्याने (Private Rental Bikes) देणाऱ्या रॅकेटचा टॅक्सी चालकांनी पर्दाफाश केला. हे चालक पर्यटकांना रीतसर परवाना नसतानाही आपल्या खासगी दुचाकी भाड्याने देऊन टॅक्सी व्यवसायाला आर्थिक फटका लावत असल्याचा आरोप टॅक्सी युनियनने केला आहे. या कारवाईदरम्यान टॅक्सी चालकांनी या तीनही दुचाकी पकडून पोलिसांच्या स्वाधीन केले. "काळ्या-पिवळ्या टॅक्सी आणि रीतसर रेंट-अ-बाईक व्यावसायिकांचे यामुळे मोठे नुकसान होत आहे," अशी भावना यावेळी चालकांनी व्यक्त केली. प्रशासनाने अशा अनधिकृत भाडेतत्त्वावरील गाड्यांवर कडक कारवाई करावी, अन्यथा तीव्र आंदोलन छेडण्याचा इशारा मडगाव टॅक्सी चालकांनी दिला आहे. या घटनेमुळे मडगावात काही काळ तणावाचे वातावरण निर्माण झाले होते.