कदंब वाहतूक महामंडळातर्फे ‘माझे-ॲप’ ही नवी डिजिटल सेवा चालू जून महिन्याच्‍या तिसऱ्या आठवड्यात सुरू होणार आहे. या माध्यमातून कदंब बसचे तिकीट काढणे, प्रवासकार्ड रिचार्ज करणे, बसचे थेट स्थान (लाईव्ह लोकेशन) पाहणे तसेच पायलट दुचाकी सेवा मागवणे अशा सुविधा मोबाईलवर उपलब्ध होणार आहेत. मोबाईलवरूनच तिकीट खरेदी, कार्डमधील शिल्लक रक्कम तपासणे आणि बसची सद्यःस्थिती जाणून घेणे शक्य होणार आहे. त्यामुळे तासन्‌तास बसची प्रतीक्षा करत ताटकळत उभे रहावे लागणार नाही. पेडणे ते काणकोणदरम्यान धावणाऱ्या कदंब बसेना या व्यवस्थेचा लाभ मिळणार असून रोख व्यवहार कमी करण्यासही मदत होईल. स्थानिक नागरिकांसह पर्यटकांनाही या सुविधांचा लाभ घेता येणार आहे.