Bicholim Leopard
डिचोली: वर्षभरात दोन बिबटे पकडलेल्या डिचोली शहराजवळील धबधबा परिसरात आणखी एक बिबटा असल्याची माहिती समोर आली आहे. गेल्या दोन दिवसांपासून धबधबा परिसरात भरलोकवस्तीजवळ या बिबट्याची दहशत वाढल्याने लोक पुन्हा भयभीत झाले आहेत. दरम्यान, या बिबट्याला पकडण्यासाठी वन खात्याने पिंजरा लावला आहे.
दहा दिवसांपूर्वी (ता. १९) धबधबा परिसरात भरलोकवस्तीजवळ एका बिबट्याला पकडण्यात वन खात्याला यश आले होते. धबधबा परिसरात वर्षभरात पकडलेला हा दुसरा बिबटा होता. गेल्या वर्षी जानेवारी महिन्यात धबधबा येथे एक बिबटा पकडला होता. दहशत घातलेल्या बिबट्यांना पकडल्याने स्थानिकांनी सुटकेचा श्वास सोडला असतानाच, आता त्याच परिसरात आणखी एका बिबट्याचा संचार असल्‍याचे स्‍पष्‍ट झाल्‍याने लोकांची घाबरगुंडी उडाली आहे.
लोकवस्तीजवळ या बिबट्याचे दर्शन झाले आहे. त्‍यामुळे सध्या लोक भीतीत वावरत आहेत. रात्री एकटे बाहेर कोणी पडत नाही, असे राजू मांद्रेकर, सुरेश नारूलकर यांनी सांगितले.
वर्षभरात दोन बिबटे पकडल्‍यानंतर पुन्हा एकदा बिबट्याने दहशत माजविल्‍यामुळे धबधबा परिसरात बिबट्यांचा अधिवास असल्याचा अंदाज लोक व्यक्त करत आहेत. भक्ष्य शोधण्यासाठी हे बिबटे लोकवस्तीत घुसत आहेत, असेही बोलले जात आहे. आता हा तिसरा बिबट्या वन खात्याने लावलेल्या पिंजऱ्यात कधी एकदाचा अडकतोय, याची प्रतीक्षा धबधबावासीयांना लागून राहिली आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.