मडगाव/म्‍हापसा: हणजूण येथे ‘लेट नाईट पार्टी’मध्‍ये सहभागी झालेल्‍या इशान बडगुजर (२१) या इंदूरच्‍या युवकाचा मृत्‍यू ‘ड्रग्‍स कॉकटेल’मुळेच झाल्‍याचे आता स्‍पष्‍ट झाले आहे. इशानच्या शरीरात मद्यासोबत एकूण पाच प्रकारच्‍या अमली पदार्थांचे अवशेष सापडल्‍याचे ‘रेन्‍डॉक्‍स’ चाचणीतून स्‍पष्‍ट झाले आहे. ३ एप्रिलला इशान हा मित्रांसह हणजूण येथे एका क्‍लबमध्‍ये पार्टीसाठी गेला होता. पार्टी आटोपून सर्व मित्र बाहेर पडले असता, इशानची प्रकृती अचानक खालावली होती. त्‍यामुळे तातडीने त्‍याला इस्‍पितळात दाखल करण्‍यात आले. मात्र, तिथे त्‍याला मृत जाहीर करण्‍यात आले. हा मृत्‍यू ड्रग्‍स ओव्‍हरडोसमुळेच झाला असावा, असा संशय त्‍यावेळी व्‍यक्‍त करण्‍यात आला होता.