Mayem Hill Cutting

डिचोली: मये पंचायत क्षेत्रातील देवूस-भटवाडी परिसरात सरकारी मालमत्तेत बेकायदेशीरपणे डोंगर कापणी सुरू असल्याची माहिती समोर आली आहे. एक स्थानिक नागरिक आत्माराम किनळकर यांनी तशी तक्रारही केली आहे.

याप्रकरणी नगरनियोजन खात्यासह, उपजिल्हाधिकारी आणि अन्य संबंधित यंत्रणांना निवेदन देऊनही कोणीच या प्रकाराकडे लक्ष देत नाही, असे किनळकर यांचे म्हणणे आहे. देवूस-भटवाडी येथील सर्व्हे नं. १५७/३ मध्ये गेल्या काही दिवसांपासून जेसीबी यंत्राच्या साहाय्याने डोंगर कापणी सुरू आहे. या प्रकाराकडे स्थानिक पंचायत किंवा अन्य यंत्रणांचे पूर्णपणे दुर्लक्ष होत आहे, असा दावा आत्माराम किनळकर यांनी पत्रकारांना माहिती देताना केला.

संबंधित यंत्रणेने या प्रकाराची गंभीर दखल घेऊन हा बेकायदा प्रकार त्वरित रोखावा, अशी मागणी आत्माराम किनळकर यांनी केली आहे. यापूर्वीही २०१८ साली याच जागेत बेकायदेशीरपणे डोंगर कापणी करण्यात आली होती, अशी माहितीही किनळकर यांनी दिली आहे.