गोव्याच्या समुद्रकिनाऱ्यावर बेकायदा मासेमारी करणाऱ्यांविरोधात मत्स्यव्यवसाय विभागाने कडक पाऊल उचलले. नियमांचे उल्लंघन करुन मासेमारी करणाऱ्या 13 ट्रॉलरवर कारवाई करत ते जप्त करण्यात आले आहेत. या कारवाईमुळे बेकायदा मासेमारी करणाऱ्यांचे धाबे दणाणले आहेत. शासनाने निश्चित केलेल्या नियमावलीबाहेर जाऊन आणि प्रतिबंधित क्षेत्रांत मासेमारी होत असल्याच्या तक्रारींनंतर ही धडक मोहीम राबवण्यात आली.

जप्त केलेले ट्रॉलर सध्या प्रशासनाच्या ताब्यात असून संबंधित मालकांवर दंडात्मक आणि कायदेशीर कारवाई केली जाणार आहे. गोव्यातील स्थानिक मासेमारांच्या हिताचे रक्षण करण्यासाठी आणि समुद्री पर्यावरणाचा समतोल राखण्यासाठी यापुढेही अशीच कठोर कारवाई सुरु राहणार असल्याचे संकेत प्रशासनाने दिले आहेत.