पणजी: कोणत्याही प्रवासात समस्या, संकटे येत राहतात. जगण्याचे नेमके मार्ग अशा वेळी सन्मुख येत नाहीत आणि डगमगलेले मन औदासिन्याकडे घेऊन जाते. जगणे परावलंबी होऊन जाते. अशा विमनस्क अवस्थेत मनाला हवी उभारी; अन्यथा जीवनातील रूक्ष जीवनशैलीतली व्यावहारिक शुष्कता मनात खोल रुजते अन् माणूसपण हरवण्याची शक्यता बळावते. अशा विभिन्न स्थित्यंतरांमध्ये दिशा दाखवणे हे ‘गोमन्तक’ आपले कर्तव्य समजतो.

विंदांच्या कवितेप्रमाणे ‘देणाऱ्याने देत जावे, घेणाऱ्याने घेत जावे’ व्रत जोपासणारा ‘गोमन्तक’ आज त्रेसष्ठ वर्षांचा झाला. वाचकांच्या निःसंदिग्ध पाठिंब्याच्या बळावर सहा दशकांची दमदार वाटचाल पूर्ण करणाऱ्या ‘गोमन्तक’ने कक्षा रुंदावून अमृत महोत्सवाच्या दिशेने वाटचाल सुरू केली आहे आणि याचा आम्हास ६३व्या वर्धापनदिनी सार्थ अभिमान आहे.