पणजी: राज्यातील १०८ आपत्कालीन वैद्यकीय सेवेच्या ताफ्यात आणखी दोन नवीन रुग्णवाहिकांचा समावेश करण्यात आला आहे. आरोग्यमंत्री विश्वजीत राणे यांच्या हस्ते या रुग्णवाहिका सेवेत दाखल करून घेण्यात आल्या.

कलरकॉन एशिया, या कंपनीकडून कॉर्पोरेट सामाजिक उत्तरदायित्व अंतर्गत देणगी स्वरूपात दोन रुगणवाहिका दिल्या आहेत. दोन्ही रुग्णवाहिका आधुनिक वैद्यकीय सुविधा आणि उपकरणांनी सुसज्ज आहेत. राज्यातील ग्रामीण आणि दुर्गम भागांत वेगवान आपत्कालीन वैद्यकीय सेवा पोहोचवण्याच्या दृष्टीने अशा मदत करणाऱ्या सेवा महत्त्वपूर्ण योगदान देत असल्याचे त्यांनी नमूद केले.

आरोग्यमंत्री राणे म्हणाले, १०८ सेवा ही गोमंतकातील नागरिकांसाठी जीवनदायिनी ठरली आहे. ‘कलरकॉन’ सारख्या कंपनीने आपली सामाजिक जबाबदारी ओळखून केलेली ही मदत निश्चित कौतुकास्पद आहे. कलरकॉन एशिया, कंपनीने आरोग्य यंत्रणेला मदत करण्याचा निर्धार केला होता, त्याची ही पूर्ती आहे, अशी माहिती कंपनीच्या अधिकाऱ्यांनी यावेळी दिली.