अमेरिका-इस्रायल आणि इराणमधील वाढत्या युद्धजन्य तणावामुळे जागतिक पुरवठा साखळी विस्कळीत झाली असून, त्याचे थेट परिणाम गोव्यात जाणवू लागले आहेत. आखाती देशांतून होणारी गॅस आयात विस्कळीत झाल्याने केंद्र सरकारच्या निर्देशानुसार राज्यातील वितरकांनी व्यावसायिक सिलिंडरचे बुकिंग तात्पुरते बंद केले आहे. या निर्णयामुळे गोव्यातील हॉटेल व्यावसायिक आणि समुद्रकिनाऱ्यावरील शॅक्सना मोठा फटका बसला आहे. सिलिंडरचा साठा संपत आल्याने अनेक उपहारगृहे बंद ठेवण्याची वेळ आली असून पर्यटन हंगामात व्यवसाय कोलमडल्याने व्यापाऱ्यांमध्ये चिंतेचे वातावरण आहे. घरगुती पुरवठ्यावरही परिणाम होण्याची शक्यता वर्तवली जात असून आंतरराष्ट्रीय संकटामुळे गोव्याचे स्वयंपाकघर आणि पर्यटन दोन्ही संकटात आले आहे.